Постојат неколку очигледни знаци дека некоја личност има солидна банкарска состојба – од облеката што ја носи до автомобилот што го вози. Иако таквите нешта понекогаш се купени на кредит, тие често претставуваат симбол на богатство. Но, една жена тврди дека постои многу посуптилен, но јасен показател на нечиј финансиски статус, а поврзан е со навика која речиси сите ја имаме – користењето на мобилен телефон, пишува „Unilad“.
Бегство од реалноста или знак на сиромаштија?
Според жената по име Џејми, бесконечното „doomscroll-ање“ на мобилен телефон е јасен показател дека некој најверојатно не е богат. Таа ја објаснила својата теорија во видео на „Instagram“.
„Знаете ли што мислам дека ќе биде еден од најголемите класни показатели во иднина — и тоа не толку далечна, туку многу блиска иднина? Тоа ќе биде прекумерното потпирање на технологијата“, изјавила таа.
Џејми објаснува дека многумина стануваат „преплавени од сè што се случува“ во светот, а „doomscrolling“-от им служи како бегство од реалноста. „Кому му е потребен одмор?“ – прашала. „На луѓето кои се преоптоварени и изгорени – а тоа не се луѓето што живеат лесен и безгрижен живот.“
Таа додала: „Луѓето кои заработуваат повеќе, кои се побогати… не ги гледате нив или нивните деца како ’iPad деца‘. Тие ги запишуваат децата на активности … Децата што добро растат не се оние кои се прекумерно зависни од технологијата.“
„Лицето на богатството“ и „лицето на сиромаштијата“
Освен навиките, наводно и цртите на лицето можат да го откријат нечиј општествен статус. Веројатно сте слушнале за изразот „resting btch face“*, но неодамнешно истражување покажало дека луѓето создаваат судови за тоа дали некој е „богат“ или „сиромашен“ само врз основа на обликот на лицето.
Истражувачите од Универзитетот во Глазгов откриле дека лицата кои се сметаат за „богати“ обично се перципираат и како подоверливи, и се карактеризираат со јасно изразени црти, подигнати веѓи и румени образи. Од друга страна, „сиромашните“ лица имаат спуштени веѓи, покуса брада, надолни агли на усните и побледи тонови на кожа, што создава впечаток на недоверливост.
Главната авторка на студијата, д-р Тора Бјорнсдотир, ги објаснила последиците од ваквите предрасуди:
„Луѓето кои се перципираат како припадници на висока или ниска општествена класа, често се проценуваат и како да имаат позитивни или негативни карактерни особини, соодветно“, рекла таа.
„Таквите проценки се формираат само врз основа на изгледот на лицето, а тоа може да има сериозни последици – вклучувајќи дискриминација и неповолна положба на оние кои се сметаат за припадници на пониската класа.“
