Компанијата „BYD“ официјално го претстави редизајнираниот „Seal 05 DM-i“, „plug-in“ хибрид со значително зголемен домет при возење само на електричен погон.

Возилото сега може да помине 128 километри само на струја (претходно 55 км), додека вкупниот домет достигнува импресивни 2.000 километри, и тоа со истата, неверојатно ниска цена од 9.640 евра!

Дизајн и димензии

И покрај ситните промени во дизајнот, должината, ширината и висината остануваат непроменети:

4780 / 1837 / 1515 mm, со меѓуосовинско растојание од 2718 mm.

Кокпитот е опремен со трикрак управувач, 8,8-инчен LCD инструмент-дисплеј и 10,1-инчен централен инфотејнмент екран, управуван преку „BYD DiLink“ паметниот систем, пишува „Revijahak“.

Класичната рачна рачка на менувачот е заменета со електронска, што овозможува повеќе простор на централната конзола.

Опрема и внатрешност

Возилото располага со рачно приспособливи предни седишта, аудио систем со 6 звучници, шест воздушни перничиња, багажник со капацитет од 508 литри и темпомат.

Хибридниот систем се состои од 1,5-литарски атмосферски бензински мотор и електромотор поставен напред.

Бензинскиот мотор има максимална моќност од 74 kW (101 КС) и вртежен момент од 126 Nm, додека електромоторот генерира 120 kW (163 КС) и 210 Nm, овозможувајќи забрзување од 0 до 100 km/h за само 7,9 секунди.

Батерија и домет

Батерискиот пакет „Blade“ со капацитет од 15,87 kWh го продолжува електричниот домет, а со полн резервоар и целосно наполнета батерија, вкупниот домет изнесува 2.000 километри.

Оваа понуда уште еднаш покажува дека ценовната конкуренција на кинескиот пазар достигнува нови размери.

За жал, вакви цени нема да гледаме во Европа.