Сè поголем број корисници на "Android"-уреди се соочуваат со апсурдна ситуација – апликациите што ги платиле едноставно престануваат да функционираат. И не, проблемот не е во апликациите, туку во самиот систем за наплата што го користи "Google Play".

Проблемот се јавува дури и кога корисникот има доволно средства на својата сметка. Системот на "Google", од непознати причини, не успева да ја изврши трансакцијата и автоматски ја поништува претплатата, оставајќи ги корисниците без пристап до услугите што секојдневно ги користат – често поврзани со работа, учење или здравје.

„Google Play“ потфрла, „Apple“ ја држи стабилноста

Според податоците на компанијата „RevenueCat“, дури 28,2% од поништените претплати на "Android"-платформата се резултат на грешка во наплатата. Кај "Apple"-корисниците тој број е речиси двојно помал – само 15,1%. Тоа значи дека корисниците на "Android" двојно почесто остануваат без платената услуга, и тоа без никаква своја вина.

Ова не само што го нарушува корисничкото доверба, туку создава и сериозни проблеми за самите апликации кои зависат од претплатите како главен извор на приход. Кога системот закаже – губат и корисниците, и девелоперите. А "Google", изгледа, сè уште нема конкретно решение.

Сериозен проблем за секојдневниот живот

Многу корисници се потпираат на апликации за работа, комуникација, фитнес или финансии. Губењето пристап дури и на неколку дена може да предизвика реални последици – доцнења, пропусти и голема фрустрација. Особено е тешко кога корисникот мора да се јавува во поддршката и да чека со денови за да се реши проблемот.

За разлика од "Apple", чиј систем плаќањата ги обработува далеку постабилно, "Google Play" очигледно има хроничен проблем со наплатата. Иако ретко се зборува за тоа, податоците покажуваат дека ситуацијата не е нова и дека трае подолго време без суштински напредок.

Корисниците ги откажуваат претплатите уште во првиот месец

Интересен податок од извештајот на "RevenueCat" покажува дека речиси 30% од корисниците ја откажуваат својата годишна претплата уште во првиот месец. Ова укажува дека корисниците брзо ја проценуваат вредноста на апликацијата – а проблемите со наплатата само ја забрзуваат нивната одлука да се откажат.

Од друга страна, оние што остануваат подолго најчесто избираат годишни планови. Апликациите со пониски цени успеваат да задржат околу 36% од корисниците по една година, додека месечните претплати, особено оние поскапи, имаат далеку пониска стапка на задржување – само 6,7%.

Пробните верзии ги привлекуваат и ги задржуваат корисниците

"Apple" се покажа како многу поефикасен кога станува збор за претворање на бесплатните корисници во претплатници. Дури 82% од корисниците што преземаат апликација со бесплатен пробен период ја активираат истата уште истиот ден – што значи дека првиот впечаток е клучен.

Апликациите што не нудат бесплатна проба веднаш губат огромна можност за конверзија.

И додека "Google Play" се обидува да ги исправи техничките пропусти, "Apple" веќе одамна ја користи психологијата на корисниците и аналитиката на податоци за да ги максимизира приходите и задоволството на своите клиенти.