Мала скулптура на две жаби и други симболи поврзани со водата, пронајдени во близина на градот Карал во Перу, им помогнаа на археолозите да потврдат дека древна цивилизација што живеела таму исчезнала поради катастрофалните климатски промени.
Археолозите ја пронашле оваа 3.800-години стара фигура, како и други скулптури на водоземци, на локалитетот Вичама, околу 160 километри северно од главниот град Лима, објави Ројтерс.
Оваа населба доживеала процут помеѓу 1800 и 1500 година пр. н. е. и била урбан центар чие население се развило по пропаѓањето на античкиот град Карал.
Археологот Татјана Абад истакна дека скулптурите на жаби симболизираат плодност и почит кон водата и дождот по долгите суши.
Таа додаде дека покрај фигурата висока 12 сантиметри, пронајдени се и остатоци од личност која изгледала неисхранета.
Според неа, фигурата на жаба, која претставува плодност и просперитет, докажува дека ова општество минувало низ криза предизвикана од климатските промени и дека на овој начин повикувало на промени кон подобро.
Древниот град Карал настанал пред околу 5.000 години и се состоел од 32 монументални градби.
Овој град постоел во исто време како и цивилизациите на Египет и Сумер, но, како што истакнаа истражувачите, се развил во целосна изолација.
Перу е лулка на античките култури и важни археолошки локалитети како што се урнатините на градот на Инките, Мачу Пикчу, и мистериозните линии и фигури „Назка“ лоцирани во пустината, потсети Ројтерс.
