Кралицата на поп-музиката Мадона го повика папата Лав да ја посети Газа како дел од неговата хуманитарна мисија за да им помогне на палестинските деца.
„Пресвети Оче, те молам оди во Газа и донеси ја својата светлина на децата пред да биде предоцна. Како мајка, не можам да поднесам да го гледам нивното страдање. Децата на светот им припаѓаат на сите. Ти си единствениот од нас на кого не може да му се одбие влез“, напиша пејачката.
Таа додаде дека пристапот до хуманитарна помош мора да биде целосно овозможен за да се спасат овие невини деца.
„Нема повеќе време. Те молам кажи дека ќе отидеш. Со љубов, Мадона“, напиша таа.
Во описот на објавата, пејачката истакна дека политиката не може да влијае на промените и дека само свеста може, и затоа му се обраќа на „Божјиот човек“.
„Денес е роденденот на мојот син Роко. Сметам дека најдобриот подарок што можам да му го дадам како мајка е да ги замолам сите да сторат сè што можат за да помогнат во спасувањето на невините деца заробени во вкрстен оган во Газа. Не покажувам со прст, не обвинувам ниту заземам страна. Сите страдаат, вклучително и мајките на заложниците. Се молам и тие да бидат ослободени. Само се обидувам да направам сè што можам за да спречам овие деца да умрат од глад“, напиша Мадона.
Таа, исто така, објави и список на хуманитарни организации и ги повика своите следбеници да донираат.
