Пипереа поднел предлог, добил поддршка од 79 европратеници?

Романскиот крајно десничарски европратеник Георге Пипереа, лидер на партијата Алијанса за унија на Романците (AUR) и член на групата Европски конзервативци и реформисти (ECR), покренал предлог за гласање недоверба на претседателката на Европската комисија, Урсула фон дер Лајен.

Пипереа го поднел предлогот минатата недела со почетни 74 потписи. Иако некои европратеници подоцна ја повлекле својата поддршка, Пипереа тврди дека бројот се зголемил на 79, доволно за предлогот формално да се разгледа во Парламентот.

Од друга страна шест функционери потврдија дека Фон дер Лајен следниот четврток ќе се соочи со гласање за недоверба во Европскиот парламент, пренесе Политико.

Најновиот предизвик за претседателката на Европската комисија доаѓа за време на нејзината турбулентна прва година од вториот мандат, а германската политичарка ќе биде принудена да дебатира за своето лидерство пред европратениците во Стразбур во понеделник, додека три дена подоцна следи гласањето.

Прв пат по 10 години

Ова е прв пат по повеќе од една деценија да се покрене гласање за недоверба против шеф на Европската комисија.

Во оваа фаза, гласањето е во голема мера симболично – повеќето политички групи веќе објавија дека ќе гласаат против предлогот за недоверба – но постапката јасно покажува растечко незадоволство од неа во Брисел, по низа контроверзни одлуки и скандали.

Причини за покренување на предлогот

Овој потег произлегува од разочарувањето на Пипереа поради необјавените пораки меѓу фон дер Лајен и извршниот директор на Фајзер, Алберт Бурла, за време на преговорите за набавка на вакцината против КОВИД-19. Дополнителни обвинувања вклучуваат можна злоупотреба на средства наменети за постпандемиско закрепнување и тврдења дека Комисијата ги охрабрила зелените политики со финансирање на невладини организации.

Мали шанси за успех

Претседателката на Европскиот парламент, Роберта Мецола, ја информираше Конференцијата на претседатели дека предлогот е во согласност со правилата утврдени во член 131 од Деловникот на Парламентот. Дебатата е закажана за понеделник, 7 јули, а гласањето се очекува да се одржи во четврток, 10 јули, за време на пленарната седница во Стразбур, а во зависност од конечната одлука на Мецола оваа недела.

За да се усвои предлогот, потребни се најмалку 361 глас од 720 пратеници, што е малку веројатно сценарио.

Пипереа рече дека верува оти повеќето пратеници ќе гласаат против предлогот, додавајќи дека иако многу пратеници се незадоволни од политиките на фон дер Лајен, тие веројатно сè уште не се подготвени да побараат нејзина оставка.

Сепак, тој се надева дека иницијативата би можела да „ја отвори Пандорината кутија“ и да поттикне понатамошни обиди за гласање недоверба во наредните месеци.

Неодамнешните активности на фон дер Лајен

Во јули 2024 година, новоизбраниот Европски парламент го потврди вториот мандат на Урсула фон дер Лајен на функцијата претседателка на Комисијата (2024 – 2029).

Таа неодамна се залагаше за развој на европска стратегија за одбранбено одвраќање до 2030 година поради страв од руска агресија врз НАТО и европските држави. Фон дер Лајен, исто така, го повика Западот да го зголеми притисокот врз Кремљ за да се запре војната во Украина.