[ВИДЕО] Додека Европа гори, студен бран на јужната хемисфера ги спушти температурите на рекордно ниско ниво

Студениот бран стана уште посилен на почетокот на неделата, а живата во термометрите покажа дури -19 степени во зори во средата во главниот град Буенос Аирес. Ова е најниската измерена температура во последните 34 години, според Аргентинската метеоролошка служба, пренесуваат медиумите во регионот.

Што се однесува до поширокото подрачје на главниот град, во Ел Паломар беа измерени -7,4 степени Целзиусови, што е најниската температура во последните 58 години и втората најниска од 1935 година.

Атлантските плажи, како што е Мирамар, кој се наоѓа на 450 километри од Буенос Аирес, беа покриени со снег на почетокот на неделата, што не се случило веќе 12 години.

Во градот Масинчао, мала заедница од 3.000 жители во Патагонија, 1.400 километри јужно од главниот град, термометрите се движат помеѓу -12 степени и -18 степени Целзиусови од понеделник. Сепак, далеку од рекордот од -35° Целзиусови, кој датира од 1991 година.

Невладината организација специјализирана за помош на бездомниците, Проекто 7, објави дека девет лица починале од изложеност на студ низ целата земја во последните 10 дена, од почетокот на зимата на јужната хемисфера. Сепак, властите сè уште не ги потврдиле овие податоци, ниту го презентирале официјалниот број на жртви.

Невладината организација се осврна на случаите за кои пишуваше локалниот печат во провинциите во последните недели. Жена беше пронајдена почината на паркинг во Мар дел Плата (југ), маж беше пронајден мртов на клупа во Парана (север).

Медиумите потсетуваат дека додека во Аргентина умираат од студ, Европа гори од високи температури. Веќе неколку дена, Франција, Италија, Шпанија, Португалија, Грција, Германија и Турција се борат со бран на екстремна топлина.