Погрешно е мислењето дека Јапонците јадат само суши. Напротив – нивното мени е преполно и освен риба содржи морски плодови и зачински билки, зеленчук, соја, ориз, овошје, зелен чај.

Висококалоричните јадења, како и брзата храна, ретко може да се видат на нивната чинија. При изборот на храна важно им е да биде сезонска и свежа, на зима јадат месо, риба, супа и пијат топли напитоци, додека пак на лето јадат плодови од морето, ладна супа, салати.

Зеленчукот секогаш се сече на листови

Варењето, печењето на жар, варење на пареа, динстување со малку масло – така се подготвува храната во Јапонија. Зеленчукот секогаш се сече на тенки листови за што помалку термички да се обработи, а да ги задржи своите хранливи материи.

Природната убавина, бојата и вкусот им се на прво место, затоа се многу внимателни со зачините и не претеруваат со нив заради здравјето на желудникот.

Јадат полека

Внесувањето на храната кај Јапонците значи ритуал. Јадат полека, во мали залчиња и мали порции. Храната ретко се декорира затоа што се инсистира на природниот изглед, а речиси никогаш не ставаат две различни јадења во иста чинија затоа што тоа се смета за недостаток на вкус.

Секогаш ориз

Оризот е составен дел од речиси секое јадење во Јапонија, а најчесто се подготвува само со додавање на сол и путер.

Разновиден појадок

Во Јапонија појадокот е таков што мора да се состои од различни намирници и неколку мали порции. Треба да има неколку јадења, вообичаено риба, ориз, омлет, супа и малку зеленчук. Покрај тоа, секако тука е и чајот.

Нема слатки и колачи

Јапонците ретко јадат десерти, а кога јадат тоа го прават во мали количини. Немаат големи торти и колачи, а прават сладолед од ориз. Ова се слатки со ниско ниво на шеќер и веројатно ние не би ги сакале со оглед на тоа дека сме навикнати на навистина слатки десерти.