Истражувањата покажуваат дека генерацијата Z (од 18 до 26 години) е најсклона да користи вештачка интелигенција во својот љубовен живот. Според анкетата, 15% од испитаниците ја користат ВИ за планирање состаноци, додека 12% бараат совети за врски.

Малку помалку отворени за ова се милениумците (од 29 до 44 години) – 9% од нив користат вештачка интелигенција за организирање состаноци, а 11% за љубовни совети.

Скептицизам кон вештачката интелигенција

И покрај зголемената употреба, повеќето млади сè уште не ѝ дозволуваат на вештачката интелигенција да ја преземе улогата на Купидон. Според истражувањето, 72% од генерацијата Z и 76% од милениумците никогаш не користеле ВИ за романтични цели. Главните причини се сомнежите за автентичноста и вистинската поврзаност.

Ајли Булок, експерт за односи и советник за апликацијата Paired, објаснува зошто младите се претпазливи:

"Апликациите за состаноци се исцрпувачки, а по пандемијата, луѓето сè повеќе бараат личен контакт. ВИ изгледа како уште една алатка што ги оддалечува врските од вистинската човечка интеракција, па затоа многумина се скептични."

Како технологијата влијае на љубовните врски?

Испитаниците откриле и кои проблеми во врските ги предизвикува технологијата.

• Најчестиот проблем за генерацијата Z и милениумците е користењето на телефоните за време на заедничкото време – 57% од младите и 68% од милениумците го сметаат тоа за одвлекување на вниманието.

• Други проблеми се играњето видеоигри и одговарањето на деловни пораки надвор од работното време.

Иако вештачката интелигенција сè уште не е широко прифатена во љубовните врски, интересот расте.

Дали ВИ може да помогне во односите?

Речиси 19% од милениумците изјавиле дека би размислиле да користат вештачка интелигенција во иднина за советување, партнерска терапија или вежби за парови.

"Преголемото потпирање на вештачката интелигенција може да доведе до намалена емоционална интелигенција и послаби вештини за решавање на конфликти во врските."

"Предизвиците во врските отсекогаш се решавале со помош на книги, пријатели или терапевти – вештачката интелигенција е само уште една алатка. Таа нема да ја замени реалната врска, но може да им помогне на паровите подобро да се снајдат во модерните љубовни односи."

Технологијата како дел од иднината на врските

"Наместо да се плашиме од новите технологии, треба да се фокусираме на тоа како тие можат да го подобрат начинот на поврзување. Тој воз веќе се движи, сакале ние или не." – заклучува Булок.