Во текот на тестирањето, хирурзите ќе вградат импланти во мозоците на субјектите кои страдаат од зависност. Станува збор за нов метод на лекување – "Brain-PACER", кој функционира како „мозочен пејсмејкер“. Овој уред со помош на електроди ги регулира потребите за супстанции и ја подобрува самоконтролата.

Техника што веќе се применува кај други болести

Оваа техника веќе се користи за контрола на последиците од Паркинсонова болест, депресија и опсесивно-компулсивно однесување, а на сличен начин може да помогне и во намалувањето на зависничките желби. Тестирањата ќе се спроведуваат во универзитетските болници во Кембриџ и Лондон, а методот што ќе се применува е длабока мозочна стимулација (DBS).

Претходни истражувања покажале дека "DBS" може да помогне во лекувањето на зависност, но ова е прва голема студија која вклучува пациенти со тешки форми на болеста.

Како функционираат мозочните импланти?

Директорката на проектот, професорката Валери Вун, објаснува дека мозочните импланти функционираат слично како пејсмејкерите – исто како што тие ги регулираат неправилностите во работата на срцето, така и овие уреди влијаат врз мозочната активност.

Имплантите се вградуваат во делот од мозокот кој е одговорен за донесување одлуки, мотивација и наградување, а се поврзуваат со дополнителен уред вграден во градите на пациентот. Целта е да се намали желбата за алкохол и дроги.

Кој може да учествува во тестирањето?

Во првата, пробна фаза ќе бидат избрани шест пациенти со зависност од алкохол и шест пациенти со зависност од дрога.

За учество може да се пријават лица кои најмалку пет години се борат со зависноста и кои досега барем трипати се обиделе да се излечат, користејќи традиционални лекови и психотерапија.