На денешен ден во 1985 година, светот беше сведок на првата професионална борба на Мајк Тајсон. Тој историски момент го означи почетокот на една од највпечатливите кариери во историјата на боксот.
На 6 март 1985 година, осумнаесетгодишниот Тајсон зачекори во рингот во „Empire State Plaza Convention Center“ во Албани, каде се соочи со Хектор Мерцедес во своето професионално деби.
Раѓање на легенда
Уште во неговата аматерска кариера Тајсон покажал дека има потенцијал да стане експлозивен професионален боксер, но оваа борба требала да биде првиот тест за неговата сила на професионално ниво. Борбата беше кратка, а Тајсон одлучно ја демонстрирал неговата разорна сила. Иако Мерцедес во првите неколку секунди успеал да му зададе солиден удар на Тајсон, Мајк брзо ја презел контролата со својата агресивна тактика.
Тој безмилосно го нападна Мерцедес со комбинации на силни удари по телото и главата, принудувајќи го во аголот од рингот. Конечно, серијата од седум неодговорени удари, вклучително и разорното лево кроше во телото, го принудија Мерцедес да падне на колена. Мерцедес остана клекнат, сигнализирајќи му на судијата дека е готов, така што борбата заврши со технички нокаут по само 107 секунди од првата рунда.
Оваа борба го означи почетокот на метеорскиот подем на Мајк Тајсон во светот на професионалниот бокс. Во првата година од професионалната кариера имаше 15 борби. Од неговите први 28 борби, 26 победил со нокаут или технички нокаут, а 16 пати победил во првата рунда.
Победата на Тајсон над Мерцедес беше првиот чекор кон неговата цел да стане најмладиот светски шампион во тешка категорија, која ја постигна само 20 месеци подоцна. Агресивниот стил и неверојатната сила на Тајсон почнаа да ги менуваат очекувањата за младите боксери во тешка категорија.
Тој стана културна икона
Брзиот подем на Тајсон кон врвот почна да го привлекува вниманието на медиумите, трансформирајќи го во боксерска сензација и културна икона. Дебито на Тајсон против Мерцедес ќе остане запаметено како моментот кој го најави доаѓањето на еден од најдоминантните и најконтроверзните боксери на сите времиња.
Оваа годишнина нè потсетува на неверојатниот талент и експлозивниот почеток на кариерата на „Железниот“ Мајк Тајсон, чие влијание врз спортот останува неизбришливо.
