Менопаузата, која обично се јавува на возраст од 45 до 56 години, носи бројни промени во телото поради намалувањето на естрогенот, вклучително и оние поврзани со исхраната.
Гинеколог специјализиран за менопауза д-р Димпна Вејл објаснува дека на жените во текот на менопаузата им треба повеќе калциум отколку порано.
„По 51-та година, препорачаниот дневен внес на калциум се зголемува од 1.000 на 1.200 милиграми. Идеално, ова доаѓа од исхраната, а додатоците може да се користат за да се пополнат сите недостатоци“, изјави таа за „Парад“.
Калциумот е клучен за зајакнување на коските, бидејќи менопаузата го забрзува губењето на коскената маса, зголемувајќи го ризикот од остеопороза.
Покрај калциумот, витаминот Д игра клучна улога во апсорпцијата на овој минерал.
„Како што старееме, способноста на кожата да произведува витамин Д опаѓа, што може да доведе до недостиг“, вели Вејл.
Без доволно витамин Д, телото не може ефикасно да го искористи калциумот што го внесува. Препорачаната дневна доза на витамин Д е 600 меѓународни единици, а тестовите на крвта можат да откријат можни недостатоци.
Од друга страна, гинекологот тврди дека на жените по менопауза, односно во периодот постменопауза, им треба помалку од една хранлива состојка – железо. Причината за тоа е што жените по 50-тата година веќе немаат месечно крвавење.
„Вишокот на железо може да се акумулира во органите како што се црниот дроб и срцето и да предизвика здравствени проблеми“, предупредува д-р Вејл.
Препорачаната дневна доза на железо во овој период од животот е осум милиграми, што лесно може да се постигне преку исхрана, на пример, со консумирање бел грав, спанаќ или говедско месо.
Д-р Вејл, исто така, ја нагласува важноста на внесот на протеини и влакна за време на менопаузата. Овие хранливи материи го поддржуваат целокупното здравје, вклучувајќи го варењето и зачувувањето на мускулната маса.
„Ако имате прашања во врска со нутритивните потреби за време на менопаузата, консултирајте се со доктор или нутриционист. Исто така, тестовите на крвта можат да откријат какви било недостатоци, а нутриционистот може да помогне да ја прилагодите вашата исхрана на вашите потреби и преференции. Правилната исхрана обезбедува здравје и виталност за време на менопаузата – и периодот што следи“, заклучи д-р Вејл.
