Постои можност огромен резервоар на вода да се наоѓа длабоко под површината на Марс во скршени магматски карпи и да е толку голем што би можел да наполни океан кој би ја покривал површината на целата планета, заклучија научниците врз основа на Сеизмички податоци добиени од роботскиот лендер „InSight" на агенцијата НАСА, за време на мисијата што ја истражуваше внатрешноста на Марс.
Водата, која се наоѓа на околу 11,5 до 20 километри под површината на Марс, потенцијално нуди услови поволни за одржување на микробиолошки живот, било во минатото или сега, велат истражувачите, пренесува "Reuters".
„На овие длабочини, кората е доволно топла за водата да постои како течност. На помали длабочини, водата би била замрзната“, соопшти Вашан Рајт од Универзитетот Вашингтон во Калифорнија, Сан Франциско, водечки автор на студијата објавена во понеделникот во "Proceedings of the National Academy of Sciences".
Дали има живот на Марс?
Лендерот "InSight" слета на Марс во 2018 година за да ја проучува внатрешноста на планетата, собирајќи податоци за различните слоеви на планетата. Мисијата на лендерот заврши во 2022 година.
Научниците добија податоци кои укажуваат на присуство на вода во скршените магматски карпи.
Површината на Марс денес е студена и неплодна, но некогаш била топла и влажна. Студијата сугерира дека голем дел од водата што се наоѓала на површината на Марс не избегала во вселената, туку се филтрирала во кората.
Геолошките истражувања покажаа дека пред повеќе од три милијарди години на површината на планетата имало езера, реки и океани.
Рајт рече дека не постои начин директно да се проучува водата под површината на Марс, но тие можат да ја истражат судбината на минатите површински води, минатиот или постоечки живот и да проценат што ќе им треба за идните мисии.
„Без проточна вода, немате живот“, вели професорот Мајкл Манга од Универзитетот во Калифорнија, кој учествувал во истражувањето. „Значи, ако има услови за живот на Марс, тие би можеле да бидат длабоко под земја.
