Неверојатна исповед на мексиканскиот фудбалер Ерик Лира!
Играчот од средниот ред на Круз Азул откри како се подготвувал за дуелот со една од најголемите ѕвезди на светскиот фудбал, Џуд Белингем, на Светското првенство во 2026 година. Неговите зборови привлекоа големо внимание.
Во разговор за поткастот „Creativo“, Лира се наврати на осминафиналниот натпревар меѓу Мексико и Англија, во кој Англичаните победија со 3:2. Посебна задача на мексиканскиот фудбалер била да го запре асот на Реал Мадрид, кого го смета за еден од најдобрите играчи на планетата.
Кога дознал дека ќе се соочи токму со Белингем, Лира знаел каков предизвик го очекува. Сепак, начинот на кој решил да се мотивира е прилично шокантен!
„Кога дознав дека играме против Англија, помислив дека ќе морам да го чувам Џуд Белингем. Тој е меѓу петте или десетте најдобри фудбалери во светот. Неверојатен е“, раскажа Мексиканецот, а потоа откри што му минувало низ главата пред натпреварот:
„Морам да го изедам. Да го удирам, да го влечам, да го плукнам ако треба. Не знам што сè ќе му направам“, рече Лира.

Белингем му даде два гола, Мексиканецот го призна поразот
Сепак, големата мотивација не била доволна за да го запре англискиот ас. Белингем постигна два гола и беше еден од клучните играчи во победата на својата репрезентација, додека Мексико го заврши настапот на Мундијалот.
Лира не се обидел да ја избегне одговорноста, туку искрено признал дека не успеал да ја исполни задачата.
„На крајот ни даде два гола. Луѓето ме прашуваат дали го запрев Белингем. Не, ни постигна два погодока. Не велам дека тоа беше само моја одговорност. Сите бевме одговорни“, призна мексиканскиот фудбалер.
Поразот особено тешко му паднал затоа што Мексико играл пред своите навивачи. Емоциите го совладале по последниот судиски свиреж.
„Плачев по натпреварот. Не липав, но ми беше тешко. Сепак, ако веќе морам да загубам, сакам да загубам на таков начин, давајќи сè од себе до последниот момент“, откри Лира.

Белингем го воодушевил со потегот по натпреварот
Она што се случило по средбата, сепак, оставило посебен впечаток врз Мексиканецот. И покрај жестокиот пристап што го најавувал пред дуелот, Белингем му пришол по последниот судиски свиреж и му покажал голема почит.
„Ми пријде и ми подаде рака. Му посакав среќа и му реков дека се надевам оти ќе станат светски прваци“, раскажа Лира.
Потоа следувал момент што никогаш нема да го заборави. Англискиот репрезентативец му упатил комплимент што многу му значел.
„Ми рече: ’Одличен играч си и имаш големо срце. Се надевам дека еден ден ќе играш за голем клуб‘“, откри Мексиканецот.

Двајцата подоцна повторно се сретнале и ги размениле дресовите, па Лира дома понел спомен од дуелот со една од најголемите ѕвезди на денешниот фудбал.
„Подоцна повторно го сретнав и го прашав дали го има дресот и дали можеме да ги размениме. Се согласи. Така си заминав дома со дресот на Белингем и со неговите зборови“, заклучи Лира.
Мексиканскиот играч од средниот ред не успеал да ја запре ѕвездата на Реал, но од средбата понел нешто многу повредно од самиот фудбалски дуел – почит од еден од најдобрите играчи во светот.
















