[ВИДЕО] Магијата си е магија: Ти благодариме што нè потсети како беше некогаш…

Точка

16/11/2026

12:52

1.907

Големина на фонт

а а а

Му аплаудираа и навивачите на Реал Мадрид кога играше за Барселона. Можеше да биде најдобриот фудбалер на сите времиња и според статистиката и според сите други мерила. Во својата богата кариера освои Златна топка, стана светски шампион и крена цел куп трофеи во домашните натпреварувања …

Како постар брат, татко или дедо, тешко дека ќе му објасните на некое дете што штотуку почнало да следи фудбал кој е Роналдињо. Денес идоли се некои други, како Мбапе и Халанд, а пред нив беа Меси и Роналдо. Тешко е да му доловите што значеше Роналдињо на дете што допрва открива какви емоции може да разбуди најважната споредна работа на светот.

Иако станува збор за третата италијанска лига, далеку од врвот на професионалниот фудбал, најголемиот фудбалски магионичар повторно замавна со волшебното стапче, долета во Италија и заигра за Равена во Серија Ц. Никого не го интересираше резултатот уште пред натпреварот против малку познатиот Форли. Ниту по победата од 2:0 главна тема не беше триумфот, туку прочуениот Роналдињо.

Скромноста го красеше и во најславните денови, а така беше и синоќа. Најчесто ја додаваше топката од прва, себичноста му беше сосема туѓа, а токму тој ја почна акцијата за првиот гол на Равена. Одработи само еден тренинг со новите соиграчи, а на теренот во неколку наврати покажа зошто е еден од најомилените фудбалери на сите времиња. И тоа го велам скромно, како што би рекол и самиот Роналдињо. Инаку, лесно би можеле да кажеме: најомилениот.

И така, на 46 години, долго откако се пензионира и престана активно да игра фудбал, Роналдињо дојде во Равена и со себе ги „поведе“ најголемите светски медиуми, па и целата планета. Едноставно, таков е тој. Виртуоз со топката, со препознатливата насмевка. Магионичар, класа, легенда. Се надеваме дека ќе одигра уште некој натпревар, барем за оние за кои токму тоа време беше фудбалот.