Најмалку шест лица загинаа, а 20 други се ранети во израелски воздушен напад врз објект во болницата „Насер“ во јужниот дел на Појасот Газа рано утринава. Меѓу загинатите има и еден хирург, изјави портпарол на службата за цивилна одбрана во Газа.

Израелската војска подоцна соопшти дека цел на нападот бил високорангиран припадник на Хамас и други членови на вооруженото крило на групата, тврдејќи дека тие дејствувале од внатрешноста на болницата во Кан Јунис.

Во соопштението, војската го обвини Хамас дека го користи болничкиот комплекс како команден центар за воени операции. Се тврди дека во болницата се наоѓаат складиште за оружје, простории за команда и контрола, набљудувачки пункт и засолниште за борци.

Ројтерс не можеше независно да ги потврди тврдењата на израелската војска.

Сцени на уништување во болничкиот комплекс

Махмуд Басал, портпарол на цивилната одбрана во Газа, изјави дека израелскиот воздушен напад го погодил хируршкото одделение во болницата, предизвикувајќи големи оштетувања.

Снимките од внатрешноста на болницата, до кои дојде Ројтерс, прикажуваат големи разурнувања – делови од ѕидови и мебел се расфрлани низ просториите, а жици висат од оштетените тавани.

На снимките се гледаат луѓе кои носат повредени пациенти на носила низ ходници полни со урнатини, додека други им помагаат на ранетите да се движат низ остатоците од објектот. Се гледаат и лица кои изнесуваат тела, додека пожарникари работат околу зградата.

Хамас: Ова е воено злосторство

Портпарол на Хамас го осуди нападот, нарекувајќи го „чист воен злостор“.

Израел, кој ги засили нападите врз палестинската енклава, тврди дека Хамас се обидува да се прегрупира и да го обнови својот арсенал. Од Хамас велат дека остануваат посветени на примирјето постигнато пред една година и го обвинуваат Израел дека се обидува да го поткопа тој договор.

Според здравствените власти во Газа, најмалку 1.600 Палестинци загинале во израелските напади врз оваа област откако е потпишан договорот, додека Израел наведува дека загинале четворица негови војници. Здравствените власти во Газа наведуваат дека повеќе од 74.000 луѓе се убиени откако Израел го започна нападот врз Газа во октомври 2023 година.

Израел ја започна офанзивата откако припадници на Хамас извршија напад врз јужен Израел, во кој, според израелски податоци, загинаа околу 1.200 луѓе.