Поранешниот атлетичар бил врзан за кревет, персоналот го мачел гушејќи го со перница, го удирале и клечеле врз него. Набргу потоа биле уапсени четворица медицински техничари, на кои им бил одреден истражен притвор под сомнение за тешко убиство.

Семејството на Периш било загрижено за неговата психичка состојба, па се јавиле во психијатриската болница, но не ни насетувале дека во таа установа ќе се најде во уште поголема опасност и на крајот ќе го загуби животот.

Кој е Кристијан Јосип Периш?

Периш со години успешно настапувал за Атлетскиот клуб „Аграм“ во дисциплините фрлање ѓуле и диск. Во текот на кариерата бил јуниорски шампион на Хрватска, за сениорската репрезентација освоил три бронзени медали, а професионалната кариера ја завршил во 2021 година.

Дипломирал на Кинезиолошкиот факултет во Загреб, а работел како кондициски тренер и масер. Бил исклучително посветен на работата со лицата со попреченост и многу ценет во својата професија.

Особено се истакнал со својата работа во Хрватскиот сојуз за туркање со раце, каде што работел како кондициски тренер и масер. Бил клучен дел од стручниот штаб кој ги подготвувал хрватските параспортисти за големи меѓународни натпреварувања, вклучително и Европското првенство во Словачка и Светското првенство во Молдавија.

Сојузот се прости од него

Колку бил ценет говори и објавата на Хрватскиот сојуз за туркање со раце, чии членови биле затечени од смртта на тренерот.

„Неговото заминување остави голема празнина, не само меѓу нас, туку и во хрватскиот спорт. Тој беше голем авторитет, посветен тренер и човек кој со својата работа и несебичната посветеност остави длабока трага во хрватското туркање со раце и пара-туркање со раце. Му благодариме за сè што направи за нашите спортисти, за спортот, параспортот и за луѓето на кои им беше тренер и потпора. Почивај во мир. Засекогаш ќе остане дел од нашето спортско семејство“, наведоа од Сојузот.

Исплива снимка од Периш која го крши срцето – ова се неговите последни зборови во емисија

На социјалните мрежи во последните денови се шири снимка од Кристијан кој зборува за работата со лицата со попреченост, важноста на спортот и потребата од нивно вклучување во општеството.

Станува збор за исечок од 55-та епизода на емисијата „Nova vizura“ на Универзитетот во Загреб, во која Периш зборувал за својата работа како дипломиран кинезиолог и тренер. 

Работел со деца и лица со попреченост

Периш во емисијата зборувал за кинезитерапијата, работата со деца и лица со церебрална парализа, како и за своите активности во туркањето со раце.

Особено истакнал колку е важно на лицата со попреченост да им се овозможи да се занимаваат со спорт и да учествуваат во спортски активности.

„Работиме на тоа што поголем број лица со попреченост да ги вклучиме во спортот и параспортот, односно што повеќе да ги ангажираме. Лично забележав дека тренирањето навистина позитивно влијае врз секого, а особено врз лицата со попреченост, бидејќи, колку што забележав, ги подобрува когнитивните функции и го стабилизира расположението“, рекол Периш.

Периш голем дел од својот професионален живот го посветил на помагањето на децата и лицата со попреченост, особено на лицата со церебрална парализа и аутизам.

Зборувал за важноста од разбирањето на лицата со аутизам

Во текот на разговорот се осврнал и на искуствата од работата со лицата со аутизам. Објаснил дека некои од нив се соочуваат со тешкотии во вербалното изразување, поради што можат да чувствуваат фрустрација или да реагираат агресивно.

Тој нагласил колку е важно да се разберат нивните потреби и однесување и да им се обезбеди соодветна поддршка.

„Сè уште не е онака како што би можело и требало да биде“

Зборувајќи за вклучувањето на лицата со попреченост во спортот, Периш оценил дека Хрватска напредувала, но дека сè уште има многу простор за подобрување.

„Верувам дека свеста е подигната на повисоко ниво кога станува збор за лицата со попреченост, тренирањето и сè останато. Сигурно сè уште не сме ја достигнале инклузијата, но треба да се движиме во таа насока. Ако не се движиме, треба да почнеме. Верувам дека состојбата е подобра отколку порано, но сè уште не е онака како што би можело и требало да биде“, изјавил тој.

Разговорот го завршил со кратка порака која сега особено се истакнува во објавите на социјалните мрежи.

„Ако можеш, мораш за оние што не можат“, рекол Периш.

Семејството на Периш: Убија уште едно лице. Свршеницата на Кристијан го загубила бебето по неговата смрт

Семејството на Кристијан Јосип Периш даде ексклузивна изјава за „Jutarnji list“. Кристијан, како што велат, со нетрпение го очекувал раѓањето на детето со својата свршеница, која по неговата смрт го загубила бебето. Тие порачуваат дека не го убиле само него, туку и детето што таа го загубила пред неколку дена.

Поради сè низ што поминуваат, како и поради објавените фотографии, како што велат, доживеале дополнителни трауми и побарале лекарска помош.

Четворица медицински техничари осомничени за неговото убиство

Периш починал на 21 октомври за време на престојот во Клиниката за психијатрија „Свети Иван“. Две недели подоцна биле уапсени четворица медицински техничари поради сомнение за тешко убиство.

Истражителите се сомневаат дека при физичкото ограничување на пациентот примениле прекумерна сила. На четворицата осомничени им бил одреден истражен притвор, а околностите на настанот сè уште се истражуваат.

„Jutarnji list“ објави детали од снимките од болничкиот видеонадзор на кои се гледа постапувањето кон Периш пред неговата смрт. Снимките предизвикаа бројни реакции во јавноста, а семејството бара да се утврдат сите околности на настанот.

Во меѓувреме, започнати се и надзори врз постапувањето на болницата, вклучително и прашањата за примената на мерките за присилно ограничување и одговорноста на здравствените работници.