Актерката Џуди Денч никогаш не била личност што прифатила доследна рутина на вежбање. Кога „Гардијан“ ја прашал за нејзините фитнес-навики, легендарната актерка имала незаборавно објаснување:

„Дали јас вежбам? Воопшто не. Пијам шампањ. Ќе почнам да вежбам утре“.

Тогаш отворено признала дека едноставно не води сметка за одржувањето на физичката кондиција и дека смета оти е „многу лоша во тоа“.

Сепак, постои една активност во која ужива во својот дом во Сари. Тоа е пливањето.

Како што пишувал „Гардијан“, сите членови на семејството на актерката се страсни пливачи кои „одлично го користат“ базенот во дворот, додека Џуди Денч „редовно плива“.

„Џуди Денч, која продолжува да плива и во своите деведесетти години, е потсетник на тоа колку е важно да пронајдеме активности во кои ќе уживаме во текот на целиот живот“, вели физиотерапевтката и основачка на апликацијата „Power of Mum“, Никол Чепмен, и додава:

„Вежбањето одеднаш не станува помалку важно само затоа што сме достигнале одредена возраст“.

Пливањето е моќна форма на физичка активност која го штити нашето тело од многу физички промени поврзани со стареењето, без пречките што можат да се појават при кревање тегови или други поинтензивни рутини, како што се незнаењето што треба да се прави, стравот од повреда или немањето членство во теретана (базените обично нудат можност за плаќање на поединечен влез).

Науката покажува дека постојат три големи придобивки од занимавањето со пливање, а Чепмен објаснува како тие функционираат.

Три придобивки од пливањето во поодминатите години

Ја зајакнува мускулната сила, што е корисно за зглобовите

Водата поддржува голем дел од телесната тежина, со што се намалува притисокот врз зглобовите и се овозможува послободно движење и активирање на мускулите без удари, вели Чепмен.

Едно истражување за вежбањето во вода покажало значително подобрување на болките во зглобовите, вкочанетоста и подвижноста кај лицата со остеоартритис.

Значително го намалува ризикот од падови

Големо четиригодишно истражување спроведено на повеќе од 1.700 мажи на возраст од 70 и повеќе години открило дека редовните пливачи имаат 33 проценти помали шанси да паднат во споредба со постарите лица кои практикуваат други форми на вежбање, благодарение на подобрената рамнотежа и стабилноста на трупот.

„Водата создава отпор при секое движење, помагајќи во зајакнувањето на мускулите на долниот дел од телото, а истовремено ги активира и мускулите на трупот – и двете имаат важна улога во одржувањето на стабилноста“, објаснува Чепмен.

Го подобрува когнитивното и кардиоваскуларното здравје

Истражувањата докажуваат дека пливањето ја подобрува кардиоваскуларната ефикасност и го зголемува протокот на крв во мозокот, што помага во одржувањето на когнитивните способности, меморијата и распонот на вниманието со напредувањето на возраста.

„Аеробните вежби, како што е пливањето, го поттикнуваат протокот на крв во мозокот, што е поврзано со подобра когнитивна функција како што старееме“, вели Чепмен и додава:

„Пливањето може да има и смирувачки ефект врз нашиот нервен систем. Повторувачките движења, во комбинација со контролираното, ритмично дишење, можат да помогнат во намалувањето на чувството на стрес и анксиозност“.