Американскиот државен секретар Марко Рубио оцени дека санкциите и поморската блокада вршат доволен притисок врз Техеран и дека Вашингтон засега може да се воздржи од нови големи воени операции.
По состанокот на министрите за надворешни работи на Г7 во Париз, Марко Рубио изјави дека американската влада смета оти економските мерки ја постигнуваат целта поради која би разгледала нови удари. Според него, притисокот врз Техеран се засилува од ден на ден, пренесува Ројтерс.
Рубио ги посочи санкциите и поморската блокада како главни инструменти на Вашингтон. Според неговата проценка, ограничениот пристап на Иран до светскиот енергетски пазар ја намалува потребата од големи воени операции.
Марко Рубио на средба со Володимир Зеленски во Минхен во февруари 2026 година, архивска фотографија. Фото: Фреди Еверет / Стејт департмент
Изјавата следува еден ден откако претседателот Доналд Трамп рече дека засега ќе се воздржи од нови удари. Според Ројтерс, одлуката дошла по апели од држави во регионот, меѓу кои и Катар.
Вашингтон останува отворен за договор со Иран, изјави Рубио во Париз. Тој додаде дека условите што ги поставува Техеран се неприфатливи за американската страна.
