Хрватскиот авантурист Кристијан Иличиќ го посетил Народниот парк (People’s Park) во кинескиот град Ченгду, каде што родителите оставаат огласи со информации за своите невенчани деца, надевајќи се дека на тој начин ќе им пронајдат идеален партнер.
Видеото го објавил на Инстаграм и го опишал како „Тиндер во вистинскиот живот“.
„Во Народниот парк во Ченгду, Кина, постои еден навистина необичен дел што многумина го опишуваат како Тиндер во вистинскиот живот. Родителите овде оставаат огласи за своите синови и ќерки, на кои се наведени основни информации како име и презиме, датум на раѓање, висина, место на живеење, како и критериуми што треба да ги исполнува идниот партнер“, раскажал Иличиќ во видеото.
Во описот на објавата додал дека родителите во огласите ги наведуваат и возраста, образованието, работното место и приходите на своите деца.
Како што вели, на прв поглед сè изгледа како обичен дел од паркот.
„Само што, наместо повлекување налево и надесно како на Тиндер, овде родителите се тие што бараат потенцијална љубов за своите деца. Навистина е неверојатно кога ќе помислите каква технологија има Кина и во какво време живееме, а љубовта сè уште се бара на ваков начин, преку овие ливчиња“, истакнал тој.
Во описот на објавата напишал дека станува збор за старомоден начин на запознавање, без апликации и алгоритми, во кој „мама и тато ги преземаат работите во свои раце“.
