Познатата израелска актерка Чели Голденберг била запрепастена кога дознала дека нејзините остри критики за израелската политика кон Палестинците, изнесени за време на телевизиско интервју, всушност биле емитувани во живо.

Убедена дека камерите се исклучени и дека емисијата е прекината поради рекламна пауза, актерката отворено проговорила за израелско-палестинскиот конфликт, окупацијата на палестинските територии и длабокото разочарување од состојбата во сопствената земја.

Долгогодишната актерка гостувала во програма на израелската телевизија „Канал 13“, каде што разговорот првично требало да биде посветен на нејзината богата уметничка кариера и придонесот кон израелската култура.

Меѓутоа, разговорот набрзо се насочил кон политички прашања и прераснал во жестока дискусија, за време на која Голденберг без воздржување го изразила своето несогласување со израелската политика и долгогодишната окупација на палестинските територии.

„Многу би сакала повторно да почувствувам среќа и гордост поради тоа што сум Израелка“, изјавила Голденберг, не претпоставувајќи дека нејзините зборови во тој момент ги слушаат телевизиските гледачи.

Водителот потоа ја прашал: „Дали навистина дојде до тоа повеќе да не сте среќни што сте Израелка?“.

„Би сакала да бидам, но повеќе не чувствувам гордост поради тоа што сум Израелка“, одговорила актерката.

Кога водителот ја предупредил дека таквите изјави би можеле да бидат „опасни“ доколку ги изговори пред камерите, Голденберг возвратила: „Но, јас не го кажувам ова во етер. Ви го кажувам тивко“.

И понатаму убедена дека разговорот не е дел од телевизискиот пренос, таа продолжила искрено да зборува за своите чувства кон земјата во која е родена и израснала.

„Не сум горда на она во што се претворивме како народ. Тоа е ужасно чувство, особено затоа што припаѓам на генерација која порасна во едно сосема поинакво време“, изјавила таа.

„Родена сум во 1954 година. Дури и по 1967 година ни беа потребни десет години за да го сфатиме гревот на окупацијата. Тоа сознание не дојде преку ноќ“, рекла актерката.

Потоа изнела една од своите најостри оценки за израелската политика: „Окупацијата доведе до сè што следуваше. Сè што се случува денес е последица на окупацијата“.

На прашањето што, според нејзиното мислење, го карактеризира денешното израелско општество, Голденберг навела низа појави кои ги смета за особено загрижувачки.

„Верска присила, доселеници, еврејски тероризам, ароганција“, одговорила таа.

Потоа додала: „Малцинството има право да се бори за својата слобода“.

Еден од водителите се спротивставил на оваа изјава со зборовите: „Не ако притоа масакрира цивили, нашите браќа и сестри и нашите војници“.

Голденберг потоа се обидела да објасни дека нејзината критика не произлегува од непријателство кон Израел, туку токму од длабоката приврзаност кон земјата што ја смета за своја татковина.

„Јас сум голем патриот. Ја сакам оваа земја. Тоа е како кога го гледате сопственото дете како расте и станува некој поради кого мора да се запрашате: ‘Зарем вака те воспитав?‘“, објаснила таа.

Водителите изгледале изненадени од нејзините зборови, а еден од нив забележал дека таквите изјави е тешко да се слушаат уште во раните утрински часови.

Шок откако сфатила дека целиот разговор бил емитуван во живо

Дури тогаш Голденберг, се чини, сфатила дека разговорот што го сметала за приватен, всушност, цело време го следеле телевизиските гледачи.

Видно потресена и запрепастена, прашала: „Зарем во текот на целиот разговор бевме во етер? Ова не е во ред“.

Соочена со сознанието дека нејзините зборови веќе стигнале до јавноста, актерката не ја криела својата вознемиреност.

„Не го сакам ова, не сакам. Не знам што да правам сега. Навистина сум во шок. Не ми кажавте дека сме во етер. Мислев дека сме на рекламна пауза“, изјавила таа.

Во продолжението на емисијата, Голденберг директно им се обратила на гледачите и се извинила за начинот на кој го изразила своето мислење.

Објаснила дека не била свесна оти камерите сè уште биле вклучени и признала дека зборувала поостро отколку што можеби би зборувала доколку знаела дека нејзините зборови се пренесуваат во живо.

„Јас сум многу импулсивна личност и зборувам со огромна страст. Кога зборувам, целата сум во оган и пламен. Не знаев дека сме во етер“, објаснила Голденберг.

Нејзините отворени и бескомпромисни критики за израелската политика, окупацијата на палестинските територии и општествените состојби во Израел предизвикале бурни реакции на социјалните мрежи.

Додека едни ја осудувале бидејќи ги сметале нејзините изјави за непатриотски, други ѝ дале поддршка, пофалувајќи ја нејзината искреност и храброст јавно да го каже она што навистина го мисли.

Инаку Чели е едно од истакнатите имиња на израелската културна и уметничка сцена.