Претседателот на Франција, Емануел Макрон, најави забрана на нелегитимните протести низ земјата поради минатонеделните немири и насилство. Оваа мерка доаѓа по минимум разговори со безбедносните служби и со цел да се спречат грабежи и уништувања, додека нови протести се најавени поради високите трошоци за живот.
Францускиот претседател Емануел Макрон најави забрана на протестите што властите ги сметаат за нелегитимни, по минатонеделните немири, насилство и грабежи низ Франција. На организаторите на мирни собири ќе им бидат понудени алтернативни маршрути за да се заштитат продавниците и деловните објекти.
Макрон ја најави мерката по разговорите со разузнавачките служби и владините претставници за насилството за време на протестите на 17 октомври. За немирите обвини екстремно левичарски групи и лица кои, според него, ги искористиле демонстрациите за уништување имот и грабежи.
За утре најави состанок на Советот за одбрана, на кој ќе се разгледуваат дополнителни мерки за спречување на насилството.
Во сабота, на 24 октомври, низ Франција се најавени нови протести против високите трошоци за живот, на кои се очекува учество на студенти и припадници на движењето „Жолти елеци“.
Премиерот Себастијан Лекорни најави засилени безбедносни мерки, додека министерот за внатрешни работи Лоран Нуњез потврди промени во полициското постапување кон насилните групи. Предвидено е ангажирање поголем број полицајци и жандарми, како и припадници на специјалните единици и војската.
Одредени протести веќе се забранети во Париз, Лион, Лил и Гренобл, а во некои градови е воведен и полициски час.
Протестите започнаа поради незадоволството од високите трошоци за живот, состојбите во образованието и економската политика. На 17 октомври прераснаа во насилни судири со полицијата, при што, според објавените податоци, биле оштетени или ограбени околу 3.000 продавници и деловни објекти.
Синдикатите, кои бараат повисоки плати, поправедно оданочување и поголеми вложувања во јавните услуги, најавија нова голема мобилизација за 5 ноември.
