Двојката патувала со бродот на компанијата „MSC Cruises“, а поради тоа Ајзеја речиси и не можел да се движи незабележано меѓу другите патници. Бидејќи за време на крстарењето секојдневно се среќаваат истите луѓе, споредбите со музичката ѕвезда само се нижеле. Сето тоа го снимала неговата девојка Миа и го објавила на социјалните мрежи.

Покрај видеото на Инстаграм напишала: „POV: Одиш на крстарење со момчето, а луѓето мислат дека тој е Бед Бани“.

На снимката може да се видат неколку ситуации во кои патниците му приоѓаат на Ајзеја, очигледно убедени дека налетале на познатиот музичар. Миа во описот дополнително објаснила колку ситуацијата станала необична.

„Има уште еден куп негови фотографии со луѓе“, напишала таа. „И дома, во Сан Диего, му велат дека личи на него, но ова на крстарењето беше неверојатно. Тоа што е полу Порториканец воопшто не помогна во ситуацијата“.

Видеото предизвикало бројни реакции, а корисниците главно се забавувале на сметка на необичната ситуација. „Умирам од смеење!“, напишал еден корисник, додека друг коментирал: „Хаха, умирам“. Се појавиле и коментари како „Навистина ми е мило за него“ и „А притоа сериозно си ја сфатил улогата, генијално“.

Кој е Бед Бани?

Бед Бани, чие вистинско име е Бенито Антонио Мартинез Окасио, е еден од најпознатите латиноамерикански музичари во светот. Кариерата почнал да ја гради во средината на минатата деценија, објавувајќи музика на „SoundCloud“, а поширока популарност стекна по соработките со големи музички имиња, како Дрејк.

Дебитантскиот албум „X 100pre“ го објави во 2018 година, а светската популарност дополнително ја зацврсти со албумот „YHLQMDLG“ од 2020 година.

2026 година му донесе некои од најголемите успеси во кариерата. На доделувањето на Греми наградите освои награда за албум на годината за „DeBÍ TiRAR MáS FOToS“, со што овој албум стана првиот албум на шпански јазик што ја освоил таа награда.

Само една недела подоцна настапи на полувремето на „Super Bowl LX“ во Калифорнија и станал првиот латиноамерикански изведувач кој самостојно го предводел овој голем музички спектакл. Неговиот настап го следеле 128,2 милиони гледачи, со што се вброил меѓу најгледаните настапи во историјата на „Super Bowl“.