Регистрираната диететичарка од Њу Џерси, Ерин Палинки-Вејд, објаснува дека имунитетот и цревата се тесно поврзани. Кога во исхраната недостигаат влакна, ферментирана храна и клучни хранливи материи, во цревата настанува нерамнотежа што го слабее и одбранбениот систем на организмот.

Колку повеќе бои во чинијата, толку подобро

Палинки-Вејд советува во чинијата да има што повеќе овошје и зеленчук со интензивни бои. Пиперките, кивито, цитрусните овошја и брокулата се одличен извор на витамин Ц, но и на бројни други хранливи материи.

Како важен дел од исхраната ги издвојува и јогуртот, кефирот и киселата зелка, кои придонесуваат за одржување на здрава цревна флора. Влакната, кои ги има во гравот, јаткастите плодови и семките, исто така имаат значајна улога во зачувувањето на здравјето на цревата и имунитетот. Според извештајот на Американскиот колеџ за кардиологија, објавен во септември, само шест проценти од возрасните Американци внесуваат доволно влакна дневно.

Протеини и цинк

Експертката нагласува дека протеините и цинкот се неопходни бидејќи организмот ги користи за создавање имунолошки клетки. Добри извори на овие хранливи материи се немасното месо, школките и раковите, јајцата, семките од тиква и наутот.

Млекото не го зголемува создавањето слуз

Диететичарката од Јужна Каролина, Лорен Манакер, го препорачува млекото бидејќи содржи витамини А и Д, цинк и селен, кои го поддржуваат имунитетот, а истовремено придонесува и за хидратацијата. Лицата со нетолеранција на лактоза можат да изберат млеко без лактоза, кое ги содржи истите клучни хранливи материи.

За широко распространетото верување дека млечните производи го зголемуваат создавањето слуз за време на настинка, според клиниката „Mayo“, нема цврсти научни докази. Палинки-Вејд објаснува дека млекото, кога ќе се измеша со плунката, остава чувство на погуста обвивка во грлото, поради што луѓето мислат дека имаат повеќе слуз, иако организмот, всушност, не произведува поголемо количество.

Вода, чај и добар сон

Доволниот внес на течности ги одржува дишните патишта влажни, што претставува една од првите линии на одбрана од вирусите, вели Палинки-Вејд. Таа препорачува вода, супа, зелен чај и чај од ѓумбир.

Манакер додава дека за здрав имунитет подеднакво важни се квалитетниот сон, контролата на стресот и физичката активност. Додатоците во исхраната можат да им помогнат на оние што не можат да ги внесат сите потребни хранливи материи преку храната, но за нив е најдобро да се консултираат со лекар и да внимаваат на дозите, бидејќи поголемото количество не значи секогаш и подобар ефект.