Главната улога ја толкува Џош Хартнет, кој го игра Калвин Пени, рибар решен да го заштити своето семејство и начинот на живот на кој му се заканува исчезнување.

Иако морското чудовиште е измислено, приказната се потпира на вистински настани, историјата на Њуфаундленд и локалните легенди. Авторот на серијата, Џеси Меккјун, открил дека уште од самиот почеток сакал да сними приказна што ќе ги прикаже особеностите на овој дел од Канада.

„Отсекогаш знаев дека сакам да снимам нешто овде, во Њуфаундленд. По можност нешто големо и необично“, изјавил Меккјун за „Ентертејнмент викли“.

Тој додал дека сакал да ја долови застрашувачката суровост и изолираност на ова подрачје.

Куќите што пловат по морето не се измислица

Една од највпечатливите сцени во серијата прикажува семејство кое со брод ја влече својата куќа преку морето. Иако глетката изгледа речиси нереално, таа е инспирирана од вистински настани.

Од 1950-тите до 1970-тите години, властите на Њуфаундленд спроведувале програми за преселување на населението од малите, изолирани крајбрежни населби во поголеми центри. Многу семејства не сакале да ги напуштат своите домови, па буквално ги пренесувале преку вода.

„Многу семејства и денес се директно погодени од тие преселувања“, изјавил Меккјун за „Канадијан прес“.

Тој објаснил дека глетката на куќа што плови по океанот е длабоко вкоренета во колективното сеќавање на жителите на Њуфаундленд. Преселувањата не се само дел од минатото, бидејќи слични програми се спроведуваат и денес.

Во серијата оваа тема се обработува преку гласање на жителите на местото во кое живее Калвин, кои треба да одлучат дали ќе прифатат паричен надомест за преселување. Заедницата мора да одлучи дали ќе остане во местото каде што живееле генерации од нивните семејства или ќе ја прифати понудата и ќе започне нов живот.

Морското чудовиште е инспирирано од локалните легенди

Една од главните мистерии во серијата е идентитетот на суштеството што демне во морето. Нетфликс го чувал овој детаљ во тајност, а важна улога во откривањето на вистината има истражувачката на морскиот свет Фонда Хауандер, која ја толкува Мекензи Дејвис.

На крајот се открива дека станува збор за џиновска лигна, суштество кое се поврзува со бројни поморски легенди. Приказните за огромни морски суштества, необични појави и морски змии со векови се дел од фолклорот на Њуфаундленд.

Иако чудовиштето од серијата не е вистинско, џиновските лигни навистина постојат. Станува збор за ретко видени животни кои живеат во морските длабочини, а кои поради својата големина и мистериозниот начин на живот долго време поттикнувале приказни за морски чудовишта.

Вистинска трагедија што погодила илјадници семејства

Покрај локалните легенди, серијата се занимава и со економските проблеми што со децении ги погодувале рибарските заедници на Њуфаундленд. Риболовот со векови бил основа на нивната економија, но сè се променило на 2 јули 1992 година, кога Канада вовела мораториум на ловот на северноатлантски бакалар поради драстичното намалување на неговата популација.

Децении прекумерен риболов довеле до речиси целосен колапс на популацијата на бакаларот, а последиците биле катастрофални за населението кое зависело од рибарството.

Речиси 30.000 луѓе во Њуфаундленд и Лабрадор останале без работа, што се смета за едно од најголемите масовни губења на работни места во историјата на Канада. Бројни семејства останале без извор на приходи, а некои заедници никогаш целосно не закрепнале.

Токму тоа чувство на загуба е важен дел од серијата. Додека Калвин Пени се бори против заканата од морските длабочини, истовремено се обидува да ги зачува своето семејство, домот и традицијата која полека исчезнува.

Така, морското чудовиште не е само извор на неизвесност и напнатост, туку може да се сфати и како симбол на вистинските опасности со кои се соочувале генерации жители на Њуфаундленд.