Иселувањето на 87-годишна жена од нејзиниот стан во Мадрид предизвика протести низ Шпанија и го зголеми притисокот врз премиерот Педро Санчез. Демонстрантите бараат оставка од владата, обвинувајќи ја дека не успеала соодветно да се справи со станбената криза.

Шпанската влада вчера одобри пакет итни мерки во областа на домувањето

Одлуката уследи по немирите во Барселона, каде што десетици илјади луѓе протестираа барајќи брзи решенија. Овие протести се надоврзуваат на демонстрациите одржани низ целата земја за време на викендот, поттикнати од иселувањето на 87-годишната Марија дел Кармен Абаскал од нејзиниот дом во Мадрид минатиот месец. Одобрените мерки се слични на оние што парламентот ги отфрли минатата недела.

Коалициската влада на премиерот Педро Санчез нема парламентарно мнозинство; минатата недела, десничарските опозициски партии го отфрлија нејзиниот предлог за итни декрети за домување. По тој потег, Санчез повика на предвремени избори кои ќе се одржат на 29 ноември.

Итни мерки за домување

Пакетот од 21 точка вклучува стимулации за изнајмување или купување на прв дом, проширена заштита од иселување за ранливите категории граѓани и регулативи за издавање соби.

Исто така, се воведува нов данок за сезонско издавање, се забранува шпекулативно купување недвижности и се нудат даночни олеснувања за сопствениците и станарите кои редовно ги подмируваат своите финансиски обврски.

BREAKING — Pedro Sánchez:

“Spain’s Housing is not for Speculation.” https://t.co/SEGMLDT6Za

— Pamphlets (@PamphletsY) October 7, 2026

„Нема да дозволиме уште едно иселување како она што го доживеа Марикармен, или оние што се случија откако беа укинати декретите“, им рече Санчез на новинарите во претседателската палата, обраќајќи ѝ се на Абаскал со нејзиниот прекар.

Шпанскиот премиер додаде дека владата ќе формира и фонд од 10 милијарди евра за кредити до 50.000 евра за купување прв дом, како и субвенции за изградба. Бидејќи парламентот е распуштен поради изборите, овие мерки мора да бидат ратификувани од привременото законодавно тело.

Тоа тело брои 69 члена – за разлика од 350 пратеници во полниот состав на парламентот – што значи дека на коалицијата на Санчез ѝ се потребни само 35 гласа за да ги усвои мерките. Сепак, премиерот побара поддршка и од опозицијата.

„Ова не е прашање на идеологија, туку на здрав разум“, изјави тој. „Многу Шпанци очекуваат решенија – и тоа не само оние што се собираат на градските плоштади или илјадниците демонстранти на улиците. Зборувам за милиони граѓани кои очекуваат од своите претставници да покажат храброст и да им се спротивстават на моќниците, наместо да им се покорат“, рече тој.