„Не беше дрон, дојде од под вода“, рекол турскиот морнар откако екипажот бил пренесен во бугарска Варна. Тој рекол дека мисли оти бродот бил погоден од „подводна бомба“ и изнел претпоставка дека била руска, бидејќи „Ејбл“ превезувал украински товар.

Неговото тврдење засега не е независно потврдено. Бугарските власти велат дека нападот врз два трговски бродови бил комбиниран и дека биле користени морски и воздушни дронови. Кој ги испратил, сè уште не е официјално утврдено.

Нападнати два бродови, еден потонал

Нападот се случил околу 3 часот наутро во бугарската исклучива економска зона во Црното Море, на околу 130 километри од бугарскиот брег.

Погодени биле два трговски бродови – „Алфа Ватан“, кој пловел под знамето на Того, и „Ејбл“ под знамето на Палау.

„Алфа Ватан“ претрпел тешки структурни оштетувања и потонал. Бугарските служби започнале потрага по неговиот екипаж, за чија судбина засега нема потврдени информации.

На „Ејбл“ по ударот избувнал голем пожар. Сите 18 членови на екипажот го напуштиле бродот, а ги спасил бугарскиот траект „Диоскурија“. Двајца морнари биле тешко повредени и пренесени во болница во Варна.

Според бугарските власти, „Ејбл“ превезувал пченица и се движел кон југ.

Морнар: „Мислам дека беа Русите“

Еден од спасените турски морнари подоцна пред новинарите го опишал моментот на нападот.

„Јас сум од Турција. Мислам дека Русите нѝ испратија подводна бомба, по што избувна пожар. Не беше од воздух, туку од под вода. Мислам дека беше руска бидејќи превезувавме украински товар“, рекол тој, според бугарската државна телевизија БНТ.

Неговата проценка за тоа кој го извел нападот не е официјално потврдена.

Бугарскиот премиер Румен Радев изјавил дека нападот бил сложен и дека биле користени и морски и воздушни дронови.

„Дополнително треба да се обидеме да утврдиме од каде дошол нападот“, рекол Радев.

Ројтерс наведува дека извор од секторот за поморска безбедност изјавил дека првичните проценки укажуваат оти веројатно станува збор за руски напад, но бугарските власти засега не ја именуваа одговорната страна. Русија веднаш не се огласи за инцидентот.

Бугарскиот премиер: Ова е целосно неприфатливо

Радев го нарекол нападот тешко кршење на меѓународното и поморското право.

„Ова е целосно неприфатлив напад во бугарската исклучива економска зона“, изјавил тој.

Тој нагласил дека инцидентот се случил надвор од бугарските територијални води, но во рамки на исклучивата економска зона на земјата.

Нападот се случува само еден ден по уште еден смртоносен инцидент во Црното Море. Турски трговски брод што превезувал пченка се запалил по напад надвор од романските територијални води, а потоа потонал. Загинале две лица, додека 11 членови на екипажот биле спасени.

Украинскиот претседател Володимир Зеленски за тој напад ги обвинил руските дронови. Русија ниту за тој инцидент веднаш не презела одговорност.