Високиот крвен притисок многу почесто се споменува како здравствен проблем, но и пренискиот притисок може да предизвика непријатни симптоми. Вртоглавица, слабост, замор и несвестица се само некои од знаците на хипотензија, а кај луѓето кај кои веќе е утврден низок крвен притисок, одреден избор на храна и доволна хидратација можат да помогнат кога вредностите ќе паднат.

Според медицинските експерти со кои разговарал „EatingWell“, една од практичните ужини во таква ситуација е многу едноставна – една дланка благо солени јаткасти плодови со чаша вода.

Зошто токму солени јаткасти плодови?

Главната причина се крие во комбинацијата на натриум и течности. Натриумот му помага на телото да ја задржи течноста, со што може да придонесе за одржување на волуменот на крвта и крвниот притисок, особено кога неговото опаѓање е поврзано со дехидратација или засилено потење.

Јаткастите плодови притоа имаат уште една предност. Содржат протеини, здрави масти и растителни влакна, а имаат релативно малку јаглехидрати. Поради тоа се попрактичен избор од некои солени грицки богати со рафинирани јаглехидрати.

Експертите за „EatingWell“ препорачуваат помала порција, односно приближно една дланка јаткасти плодови, со чаша вода. Хидратацијата е подеднакво важна како и самата храна, бидејќи недостигот од течности може да биде една од причините за пад на крвниот притисок.

Помали и почести оброци можат да помогнат

На лицата склони кон низок крвен притисок, експертите им советуваат помали и почести оброци наместо неколку многу обилни. По голем оброк, особено ако е богат со јаглехидрати кај некои луѓе може да дојде до пад на крвниот притисок.

Освен солените јаткасти плодови, меѓу практичните опции се наведуваат хумус со интегрални крекери, свежо сирење со овошје, маслинки со зеленчук, како и супи и булјони, кои истовремено обезбедуваат течности и натриум.

Сепак, зголемувањето на внесот на сол не е универзална препорака. Потребите зависат од здравствената состојба и причината за нискиот крвен притисок, па лицата со срцеви, бубрежни или други заболувања не треба самостојно да го зголемуваат внесот на натриум.

Повремениот пад на крвниот притисок не мора нужно да биде причина за загриженост, но ако вртоглавицата, слабоста или несвестицата се повторуваат, потребно е да се разговара со лекар.

Честата или изразена хипотензија може да биде поврзана со други здравствени состојби, поради што храната не треба да го замени утврдувањето на нејзината причина.