Според анализата на Светскиот фонд за истражување на ракот („WCRF“), бројот на случаи на седум видови рак кај лицата помлади од 50 години значително се зголемил во Англија, САД и Холандија, а експертите предупредуваат дека зголемената распространетост на дебелината, нездравата исхрана, недоволната физичка активност, алкохолот и пушењето би можеле да придонесат за овој тренд.
Анализата на податоците што ја спровел „WCRF“ покажала значително зголемување на бројот на случаи на рак со рана појава кај седум видови рак во Англија, пет во САД и четири во Холандија, пренесува „Guardian“.
Во Англија, стапката на рак на простатата кај лицата помлади од 50 години од 2001 до 2023 година се зголемила речиси четирикратно, од еден на 3,6 случаи на 100.000 лица.
Во истиот период, стапката на рак на дебелото црево се зголемила повеќе од двојно, од 3,9 на 8,4 случаи на 100.000 лица, додека стапките на рак на матката и на бубрезите исто така се удвоиле.
Во САД, стапката на рак на бубрезите кај лицата помлади од 50 години се зголемила повеќе од двојно од 2000 до 2023 година, додека бројот на случаи на рак на дебелото црево, матката и панкреасот пораснал за повеќе од 50 отсто.
Во Холандија е забележано значително зголемување на случаите на рак на дебелото црево, бубрезите, црниот дроб и грлото на матката.
Истовремено, стапката на рак на белите дробови кај лицата помлади од 50 години се намалила во сите три земји, што се поврзува со намалувањето на бројот на пушачи.
Од „WCRF“ наведуваат дека околу 40 отсто од сите случаи на рак може да бидат поврзани со фактори на ризик врз кои е можно да се влијае, вклучувајќи ги дебелината, исхраната, физичката неактивност, алкохолот и пушењето, но истакнуваат и дека поголемата свесност за симптомите на болеста може да придонесе за порано откривање.
Експертите предупредуваат дека зголемениот број дијагнози не го објаснува целосно овој тренд и дека се потребни дополнителни истражувања.
Кралскиот колеџ во Лондон најави истражување со 250.000 лица за да се испита зошто расте бројот на случаи на рак на дебелото црево кај помладите возрасни лица.
