Некогашниот симбол на словенечкото алпско наследство, последниот глечер во Словенија, се свел на само неколку парчиња мраз за кои истражувачите предупредуваат дека би можеле целосно да исчезнат во рок од само неколку дена.
Научниците го следат глечерот на Триглав уште од 1946 година, кога зафаќал површина од приближно 14 хектари. Меѓутоа, во последните години тој практично престанал да функционира како глечер, што значи дека во него повеќе не се создавал ниту се придвижувал нов мраз.
„Сè укажува на тоа дека и последните остатоци од мраз буквално ќе исчезнат во наредните денови“, изјавил за „Ројтерс“, Миха Павшек од Географскиот институт „Антон Мелик“ при Истражувачкиот центар на Словенечката академија на науките и уметностите (ЗРЦ САЗУ) додавајќи:
„Лично го следам веќе 30 години и се чини дека оваа обемна задача, барем кога станува збор за глечерот во подножјето на Триглав, годинава се приближува кон својот крај“.
Поради забрзувањето на климатските промени, во текот на изминатата зима на глечерот било забележано потпросечно наталожување снег, кој потоа се стопил невообичаено рано. Со тоа, преостанатите ледени површини останале значително подолго изложени на летните горештини.
„Дури ни засолнетата локација, помалку изложена на сонце, веќе не можеше да ги спаси остатоците од овие вистински глечери“, нагласил Павшек.
Исчезнувањето на глечерот е дел од поширок тренд низ Европа, континентот што бележи најбрз пораст на температурите на планетата.
Експертите предупредуваат дека топењето на глечерите во соседна Австрија долгорочно ја загрозува стабилноста на водните текови што го напојуваат сливот на реката Сава, вклучувајќи ги реките Мура и Драва.
„Остануваме без оној мал, но клучен дел од водата што беше од пресудно значење, особено во сушните години. Ситуацијата изгледа сосема поинаку кога ги набљудуваме водотеците што се влеваат во сливот на Сава“, објаснил Павшек. „Мура и Драва во голема мера се напојуваат од глечерите во соседна Австрија. Како што тие глечери исчезнуваат – а проекциите укажуваат дека големото мнозинство ќе исчезне во наредните децении, додека до крајот на векот би можеле целосно да исчезнат ако температурите продолжат да растат – протокот на овие реки значително ќе се намали“, истакнал тој.
Овој пад на нивото на водата директно ќе ги погоди земјоделските подрачја што зависат од наводнување од овие реки, како Дравското и Птујското Поле, како и делови од Помурје.
