Актерката откри дека и двајцата всушност се големи љубители на домашната атмосфера, а нивното идеално секојдневие ги вклучува играта „Wordle“, одењето во теретана, голф, вечера дома и – задолжително – 40 минути попладневна дремка.

Кетрин Зита-Џонс (57) во ново интервју за „ААРП“ опишала како денес изгледа квалитетно поминатото време со нејзиниот сопруг Мајкл Даглас (82), со кого во ноември ќе прослави 26 години брак.

„Постојано зборуваме дека треба почесто да излегуваме. Отсекогаш сме биле вистински домашни типови“, признала актерката.

Тие се големи љубители на спортот, па ако на телевизија се пренесува некој натпревар, многу е веројатно дека ќе го гледаат.

„Го сакаме спортот. Ако нешто се игра, гледаме. Мислам буквално секој спорт. Бејзбол следам само кога ќе почне завршницата на Светската серија но тогаш целосно се внесувам“, раскажала таа.

Денот им започнува со мало брачно натпреварување

Нивниот идеален слободен ден започнува прилично едноставно – со популарната игра со зборови „Wordle“.

„Се будиме и решаваме Wordle – јас прва го решавам, а тој ме прашува за помош. Потоа појадуваме и одиме во теретана“, раскажала Зита-Џонс.

По тренингот следува лесен ручек, а потоа и ритуал кој очигледно им е подеднакво важен како и вежбањето.

„Сакаме да дремнеме 40 минути. Потоа попладне одиме да играме голф“, открила таа.

Денот го завршуваат со вечера дома, а понекогаш и со филм. Сепак, дури ни двајца оскаровци не ги поминуваат вечерите постојано гледајќи филмови.

„Можеби ќе погледнеме некој филм, иако всушност гледаме повеќе спорт отколку филмови“, признала актерката.

Нивната љубовна приказна започнала во 1998 година на филмскиот фестивал во францускиот град Довил.

Даглас претходно ја видел Зита-Џонс во филмот „Маската на Зоро“ и го замолил својот публицист да организира нивна средба. Се свршиле кон крајот на 1999 година, а се венчале една година подоцна.

Во бракот добија две деца, Дилан (26) и Керис (23), кои во последните години исто така покажуваат интерес за светот на шоу-бизнисот.

Интересен факт што го следи нивниот брак уште од самиот почеток е тоа што Кетрин и Мајкл го делат истиот роденден – и двајцата се родени на 25 септември, со 25 години разлика.

Оваа година Даглас ѝ посветил особено емотивна порака на сопругата по повод нивниот заеднички роденден и се потсетил на моментот кога првпат ја видел на филмското платно.

„Никогаш претходно не сум се заљубил во некого на филмското платно. Сè додека не ја видов Кетрин. Беше волшебна, на начин што ја надминуваше убавината. Бев сигурен, колку што човек воопшто може да биде сигурен во нешто, дека таа е вистинската“, напишал тој, цитирајќи дел од своите претстојни мемоари „One Helluva Ride“.

Додека Даглас во последните години отворено зборува за можно повлекување од актерството, Кетрин во моментов има неколку нови проекти. Веќе на 2 октомври пристигнува нејзината нова серија „Kill Jackie“, во која ја игра главната улога и е извршна продуцентка.

Во декември во кината пристигнува и филмот „The Gallerist“, кој на почетокот на годината премиерно беше прикажан на филмскиот фестивал „Санденс“.

Но кога ќе се изгаснат камерите, нивното секојдневие очигледно изгледа многу помирно отколку што би се очекувало од еден од најпознатите холивудски парови.