Актерката и добитничка на Оскар, изјавила дека поради влошувањето на видот повеќе не може да настапува на театарската сцена ниту да снима филмови. Таа боледува од старосна макуларна дегенерација, болест која сè повеќе ѝ го отежнува секојдневниот живот.

Во новото интервју за емисијата „Тудеј“ на Би-би-си Радио 4, таа отворено зборувала за последиците од болеста.

„Не можам да бидам на сцена. Повеќе не можам да глумам во театарска претстава. Повеќе не можам да снимам филмови. Повеќе не можам да читам“, изјавила Денч, пренесе „Индипендент“.

Таа објаснила дека мора да научи да живее со промените.

„Морате да се приспособите на сето тоа и да имате разбирање за сопствените ограничувања. Едноставно мора да продолжите понатаму и да не размислувате премногу за тоа“, објаснила актерката.

Тешко ѝ е да ги препознава луѓето

Денч опишала и ситуации во кои ѝ е тешко да ги препознае луѓето. Понекогаш им приоѓа и речиси ги прегрнува, а потоа им се извинува кога ќе сфати дека ги помешала со некој друг.

Додала и дека за време на интервјуто воопшто не можела да го види лицето на водителката Ема Барнет.

Особено тешко ѝ паѓа тоа што веќе не може да ја види сината боја.

„Ми рекоа дека ова лето било прекрасно да се видат сините ѕвончиња, но јас не можев да видам ниту едно. Сепак, знам како изгледаат моите дрвја. Дел од тоа го чувам во сеќавањето, а се надевам дека нешто сè уште можам да препознаам“, раскажала актерката.

Зборувајќи за стареењето, таа кратко рекла: „Во тоа нема апсолутно ништо добро. Не размислувам премногу за тоа“.

Пријателите ѝ помагаат да го научи текстот

Денч и претходно зборувала за проблемите со видот. Во интервју за списанието „Ноутбук“ во 2023 година признала дека повеќе не може да чита сценарија ниту јасно да гледа што се случува на филмскиот сет.

„Повеќе не можам да гледам на филмскиот сет. Не можам ниту да читам. Но, едноставно се справувате со тоа“, изјавила таа тогаш.

Денч објаснила и дека особено ѝ е тешко кога добива поголема улога, но пријателите ѝ помагаат да го научи текстот. Притоа, се потпира на својата фотографска меморија.

Исто така актерката во 2019 година открила дека поради проблемите со видот морала да престане да вози автомобил. Тогаш таа одлука ја опишала како еден од најтрауматичните моменти во нејзиниот живот.

„Беше апсолутно ужасно. Но, едноставно знам дека би убила некого ако сега седнам зад воланот на автомобил“, додала таа.

Што е макуларна дегенерација?

Старосната макуларната дегенерација е очна болест која може да предизвика заматување на централниот вид. Таа не предизвикува целосно слепило, но може значително да ги отежни секојдневните активности, вклучително и читањето и препознавањето лица.

Денч, чија кариера трае веќе седум децении, освои Оскар во 1999 година за споредната улога во филмот „Вљубениот Шекспир“. За своите искуства зборува и во новите мемоари со наслов „Дали е предоцна да побегнам?“ (Is It Too Late to Make a Run For It?).