„Geely“ ја претстави новата генерација на системот „Smart Charging“, кој овозможува максимална моќност на полнење до 2.250 kW.

Кинескиот производител со тоа сака да го надмине „BYD“, чиј систем „Flash Charging“ достигнува 1.500 kW.

Според резултатите од тестирањето, „Lynk & Co 01“ и „Zeekr 001“ можат да го зголемат нивото на наполнетост на батеријата од 10 на 70 проценти за четири минути и 30 секунди, додека за полнење од 10 до 97 проценти се потребни осум минути и 40 секунди.

„BYD“ за својот систем наведува пет минути за полнење од 10 до 70 проценти и девет минути за зголемување на капацитетот од 10 на 97 проценти.

"AI" ја контролира температурата на батеријата

Полнењето со толку голема моќност создава значително количество топлина, па „Geely“ користи вештачка интелигенција за надзор на батеријата.

Системот ги предвидува промените на температурата и во согласност со нив автоматски ја приспособува моќноста на полнењето.

„Geely“ наведува дека алгоритмите ја одржуваат температурата на батеријата за време на полнењето под 55 Целзиусови степени.

Претставена е и новата батерија „Ultra Short Blade“, за која компанијата тврди дека може да ја намали температурата за време на полнењето за 10 проценти.

„BYD“ во моментов има голема предност во инфраструктурата

Иако „Geely“ наведува поголема максимална моќност на полнење, „BYD“ е значително понапред според бројот на инсталирани полначи.

Компанијата за шест месеци постави повеќе од 10.000 станици „Flash Charging“ во Кина, а до крајот на годината планира вкупно 20.000.

„BYD“ планира и меѓународно проширување на мрежата, со цел до април следната година да постави 6.000 станици надвор од Кина.

Меѓу планираните пазари се Европа, Велика Британија, Блискиот Исток, Африка, Канада, Австралија и Нов Зеланд.