Откако нејзините следбеници на Инстаграм почнаа да се прашуваат како дошло до нејзината трансформација, Анисимова одлучи јавно да им одговори.

„На сите ’експерти за здравје‘ и луѓе кои сакаат да коментираат за туѓите тела – не користам Оземпик“, напиша таа во објава. „Ве молам, оставете ме на мир и не ме вовлекувајте во вашите објави“, истакна тенисерката.

Постојани коментари на сметка на изгледот

Ова не е првпат Анисимова да се соочува со коментари за својата телесна тежина. На еден корисник на платформата Икс, кој ја нарекол „премногу дебела“, таа му одговорила со фотографија од базен на која го плази јазикот, со порака: „Еве колку ме погодуваат вашите коментари“.

По турнирот во Мадрид во 2023 година таа изјави: „Неверојатен е бројот на луѓе кои секојдневно го коментираат моето тело на социјалните мрежи. Никогаш нема да ја разберам таа болна опседнатост.“ Набргу потоа привремено се повлече од тенисот за да му се посвети на своето ментално здравје.

На почетокот од оваа година повторно зборувала за оваа тема. „Тоа е постојано интернет-малтретирање. Коментарите се за апсолутно сè, но секогаш се фокусираат на моето тело, секој божји ден“, рекла Анисимова.

Моментално е 11-та тенисерка во светот

Таа моментално е 11-та тенисерка во светот. Најдобриот пласман во нејзината кариера беше третото место на ВТА-листата, кое го држеше на почетокот од 2026 година. Минатата година играше во финалето на Вимблдон, каде што загуби од Ига Швјонтек без да освои ниту еден гем. Истата година стигна и до финалето на Ју-Ес Опен. На годинашниот Ју-Ес Опен беше елиминирана во третото коло.

Анисимова во кариерата играше и во полуфиналето на Ролан Гарос во 2019 година, кога имаше само 17 години, а стигна и до четвртфиналето на Австралија Опен.