Халанд го прозва познатиот навивач: „Потстрижи се, човече“

Тој го прозва познатиот навивач на Манчестер јунајтед, Френк Ајлет, порачувајќи му кратко и јасно: „Потстрижи се, човече“.

Ајлет, кој го води популарниот навивачки канал „The United Strand“, уште во октомври 2024 година јавно вети дека нема да се потстрижи сè додека неговиот сакан клуб не оствари пет последователни победи во сите натпреварувања. Најблиску до целта беше во февруари, кога Јунајтед нанижа победи против Сити, Арсенал, Фулам и Тотенхем, но ремито против Вест Хем (1:1) го остави без одење на фризер, што во живо го следеа речиси 300.000 луѓе.

На почетокот на новата сезона градските ривали се наоѓаат во сосема спротивно расположение – Манчестер сити има максимален учинок со пет победи на пет натпревари (против Борнмут, Кристал Палас, Ковентри, Манчестер јунајтед и Сандерленд), додека Јунајтед се мачи на 12. место на табелата со само една победа.

Откако се појавија теории дека Халанд го темпирал својот нов имиџ и потстрижувањето со петтата последователна победа на Сити за да ги пецне ривалите, Ајлет изрази сомнеж во таа приказна.

Тој потсети дека Сити имал две победи на крајот од минатото првенство и дека петтата последователна победа би била токму против Јунајтед, што би имало повеќе смисла доколку сакал да го испровоцира.

Меѓутоа, норвешкиот напаѓач не му остана должен и со само еден одговор ги запали социјалните мрежи.

Целиот предизвик околу потстрижувањето уште претходно жестоко го критикуваше легендата на Олд Трафорд, Вејн Руни:

„Би го испратил на другиот крај од земјата. Ми оди на нерви. Зборуваме за Мајкл Карик и Јунајтед, кои се обидуваат да стигнат до петтата последователна победа, а целата приказна се врти околу тип кој треба да се потстрижи. Се обложувам дека би бил очаен доколку Јунајтед го добие тој петти натпревар, бидејќи одеднаш би станал неважен.“