Фотографиите до новинарите на „CBS News“ ги испратиле активни припадници на американската војска под услов да останат анонимни, поради строгите воени правила што им забрануваат да даваат изјави за медиумите.

„Станува збор за тешки оштетувања на нашите бази за кои американската јавност воопшто не е информирана“, изјавил за „CBS News“ еден од војниците, додавајќи: „Само стоиме таму со затворени очи додека нè уништуваат“.

Распарчен шпионски авион и уништени бараки

Една од фотографиите, направена во воздухопловната база „Принц Султан“ во Саудиска Арабија, прикажува директен погодок во задниот дел на четиримоторниот авион Боинг Е-3 Сентри. Опашката на леталото е целосно откината од јагленосаниот труп, на кој се наоѓал ротирачки радарски систем, клучен за собирање разузнавачки податоци од воздух.

*Последиците од иранскиот напад врз базата Камп Буеринг во Кувајт

Други фотографии од таа база прикажуваат изгорени згради и бараки од кои останале само конструкциите. Притоа, бетонските заштитни ѕидови останале недопрени.

*Последици од иранскиот напад врз базата Камп Буеринг во Кувајт

Тие некогаш се сметале за клучна заштита од мини и гранати, но се покажале како целосно бескорисни против нападите од воздух.

*Последици од иранскиот напад врз базата Камп Буеринг во Кувајт

Слични сцени се забележани и во кампот Буеринг во Кувајт, главна база за пешадијата на американските копнени сили, оклопните возила и леталата, сместена во оддалечен пустински предел северозападно од градот Кувајт.

Штетата надминува 3,7 милијарди долари, уништени десетици летала

Главниот инспектор на Министерството за одбрана на САД оваа недела објави нов извештај за војната во Иран, во кој се наведува дека „загубите на опрема“ изнесуваат до 3,7 милијарди долари, што вклучува речиси 60 уништени или оштетени летала.

*Последици од иранскиот напад врз базата Камп Арифџан во Кувајт

Во овој задолжителен извештај до Конгресот, прв од ваков вид, инспекторот наведува податоци од Централната команда на САД (ЦЕНТКОМ), според кои Иран погодил американски бази во Кувајт, Бахреин, Катар, Обединетите Арапски Емирати, Саудиска Арабија, Ирак, Оман и Јордан.

*Последици од иранскиот напад врз воздухопловната база „Принц Султан“ во Саудиска Арабија

„Ова не се поединечни ракети кои случајно успеале да ја пробијат одбраната“, додал војникот, осврнувајќи се на изразот што министерот за одбрана Пит Хегсет го употребил по смртоносниот напад врз пристаништето Шуаиба во Кувајт на 1 март, кога загинале шест американски војници.

„Ние воопшто не ги браниме тие бази. Само гледаме како ги уништуваат“, истакнал војникот.

Конгресот вчера објави список на уништените авиони и дронови

Размерите на уништувањето што ги откриваат новите фотографии се надоврзуваат на вчерашниот извештај на Истражувачката служба на американскиот Конгрес (CRS), според кој американската војска од почетокот на војната со Иран изгубила најмалку 42 авиони, додека вкупните трошоци за операцијата „Епски бес“ достигнале дури 29 милијарди долари.

Финансискиот контролор на Пентагон, Џулс Херст, пред конгресмените потврди дека голем дел од таа сума се троши за итни поправки и замена на уништената воена опрема – што вклучува најмалку 24 изгубени напредни дронови MQ-9 Reaper, вредни по 30 милиони долари, соборени авиони и уништени транспортери.

Притоа, во тие 29 милијарди долари воопшто не е пресметана штетата на погодените бази ширум Блискиот Исток, која сама по себе се проценува во милијарди долари.

Фото: CBC News