Тој ја смета вештачката интелигенција за клучна за идните иновации и развојот на целосно нови категории уреди, но истакнал дека Ајфон и екраните уште долго ќе останат во центарот на стратегијата на „Епл“.

Новиот извршен директор на „Епл“, отворено зборувал за преземањето на челната позиција во компанијата, иднината на „Епл“ и улогата на вештачката интелигенција во развојот на нови производи. Тернус, кој е дел од „Епл“ веќе 25 години, дојде на директорската позиција откако претходно го раководел хардверскиот оддел на компанијата.

Во неодамнешен поткаст, Тернус го опишал моментот кога дознал дека ќе преземе една од најважните функции во технолошката индустрија. „Каква извонредна привилегија“, изјавил Тернус, истакнувајќи дека ги сака „Епл“, луѓето со кои работи и можноста за заедничко создавање нови производи. Тој додал дека „Епл“ му е „во крвта“ и дека го преплавиле возбуда и морници кога сфатил што го очекува.

Неговиот колега Грег Џозвијак, потпретседателот на „Епл“ за глобален маркетинг, притоа ја истакнал улогата на Тернус во подобрувањето на квалитетот и доверливоста на производите на „Епл“. Според него, квалитетот на хардверот на „Епл“ дополнително се подобрил откако Тернус го презел раководењето со хардверскиот оддел.

Вештачката интелигенција како клуч за идните иновации

Тернус ја нагласил важноста на вештачката интелигенција за иднината на „Епл“. Периодот во кој моментално се наоѓа го смета за највозбудливиот дел од својата кариера, токму затоа што вештачката интелигенција отвора нови можности за развој на производи. Како пример ја навел функцијата „Smart Take“ на новиот Ајфон Дуо, која може да препознае кога корисникот сака да фотографира без да даде експлицитна наредба.

Според Тернус, вештачката интелигенција не им носи само нови можности на постојните уреди, туку отвора простор и за целосно нови категории производи. „Ова е највозбудливиот период во мојата кариера кога станува збор за развојот на производи, бидејќи вештачката интелигенција ги носи сите овие нови можности“. Истовремено, тој нагласил дека вештачката интелигенција мора да се развива внимателно и промислено.

„Правила? Нема правила“

Еден од поинтересните примери за промената на пристапот на „Епл“ е поддршката за „Apple Pencil“ на Ајфон Дуо. Стив Џобс уште во 2008 година ја отфрлил идејата за користење пенкало на Ајфон, но Тернус тврди дека тоа никогаш не го сметал за цврсто правило на „Епл“.

Тој објаснил дека „Епл“ најпрво покажал колку е функционален интерфејсот на допир на Ајпед, а потоа увидел дека пенкалото на голем екран може да понуди дополнителни можности. Истиот принцип, смета Тернус, може да се примени и на Ајфон. Неговиот пристап кон иновациите, според тоа, повеќе се темели на препознавање нови можности отколку на слепо придржување до претходните одлуки.

Ајфон останува во центарот на „Епл“

И покрај развојот на вештачката интелигенција и носливите уреди, како Ерподс и Епл Воч, Тернус не очекува Ајфон да ја изгуби својата важност. Според него, луѓето и понатаму сакаат екрани бидејќи информациите поефикасно ги обработуваат визуелно отколку преку звук. Освен тоа, екранот може да се носи во џеб, поради што телефонот и понатаму има многу практична улога.

Претставувањето на Ајфон Дуо покажува дека „Епл“ притоа не мора да избира меѓу телефоните и новите видови уреди. Преклопливиот модел носи целосно нов формат, но и понатаму останува дел од екосистемот на Ајфон. Тернус нагласил дека посебноста на „Епл“ ја гледа токму во поврзувањето на хардверот, софтверот и услугите. Кога овие елементи меѓусебно се надополнуваат, смета тој, крајното корисничко искуство може да биде многу повеќе од едноставен збир на одделните делови.

Сега и самиот Тернус стана еден од клучните делови на таа равенка на „Епл“. Неговиот период на чело на компанијата ќе биде силно поврзан со развојот на вештачката интелигенција, но и со продолжувањето на традицијата на „Епл“ за создавање нови производи, пишува „TechRadar“.