Десет истражувачки тимови беа наградени на сатирична церемонија посветена на необични и креативни научни истражувања, која за првпат се одржа надвор од Соединетите Американски Држави.
Годинешните Иг Нобелови награди, меѓу другите, ги добија научници кои проучувале млеко од лебарки, правилно дување на носот и квалитетот на почвата со помош на закопана долна облека.
Наградите ги доделува дигиталното списание „Annals of Improbable Research“, а церемонијата по 35 години одржување во САД беше преселена во Европа поради загриженоста дека некои од учесниците нема да успеат да добијат американски визи.
Награда во облик на печурка и човечко стапало
Церемонијата се одржа во конгресниот центар во Цирих, каде што наградените истражувачи добија специјално дизајнирани трофеи кои потсетуваат на комбинација од печурка и човечко стапало.
Меѓу добитниците се Матилда Брајндл и Стјуарт Вест од Универзитетот Оксфорд, како и Кетрин Ф. Талбот од Технолошкиот институт на Флорида. Тие ја реконструирале еволутивната историја на бакнувањето.
Постхумно беше награден и доктор Токуџи Уно, кој ја истражувал науката за дувањето на носот.
Посебно внимание привлече тимот кој во повеќе од 25 земји закопал дури 1.000 пара долна облека. Научниците следеле како ситните организми што живеат во почвата ја разградуваат ткаенината, за врз основа на тоа да ги проценат состојбата и активноста на почвата, пренесува „AP“.
Публиката ја затрупа сцената со хартиени авиони
Во согласност со традицијата на оваа необична манифестација, публиката на почетокот од церемонијата правеше хартиени авиони и ги фрлаше кон сцената.
Организаторите планираат идните церемонии наизменично да се одржуваат во Цирих и во други европски градови. Иг Нобеловите награди во 2027 година ќе бидат доделени во белгискиот Антверпен.
Претходните церемонии се одржуваа на американските универзитети Харвард, Технолошкиот институт во Масачусетс и Универзитетот во Бостон, но засега нема планови манифестацијата да се врати во САД.
Водителот на церемонијата и уредник на списанието, Марк Абрахамс, претходно изјави дека во текот на изминатата година станало небезбедно нивните гости да доаѓаат во земјата.
Иг Нобеловите награди не се поврзани со вистинските Нобелови награди, кои годинава ќе бидат објавени на почетокот на октомври. Нивната цел е да ги истакнат истражувањата кои луѓето најпрво ги насмеваат, а потоа ги поттикнуваат да размислуваат.
