Британката на која ѝ се заканува депортација од Шведска поради Брегзит изјавила дека се чувствува како да се соочува со „смртна казна“, само неколку часа пред да требало да биде депортирана од земјата.
„Само сакам овој кошмар да исчезне пред да умрам“, изјавила Џојс Томас (78).
„Навистина повеќе не сум истата личност каква што бев. Ова ми одзеде години од животот. Едноставно ми е преку глава“, додала таа додека ги пакувала куферите.
Томас, пензионирана медицинска сестра која живее во Шведска веќе 22 години, добила рок од четири недели да ја напушти земјата.
Нејзиниот сопруг Гвин починал од рак во 2023 година. Дури при враќањето од Обединетото Кралство во 2022 година, каде што го посетиле својот втор син во Брајтон, тие за првпат дознале дека по Брегзит требало да поднесат официјално барање за престој во Шведска, пишува „Гардијан“.
Нејзиното подоцнежно барање од 2023 година да остане во земјата било поднесено по истекот на официјалниот рок. Сепак, таа изјавила дека на нејзиниот сопруг, кој се грижел за сите домашни обврски, претходно му било кажано дека по Брегзит не треба да преземат ништо.
Во ноември првпат ѝ било кажано дека мора да ја напушти земјата, а по жалбата во август добила известување дека Управниот суд во Лулео ја потврдил одлуката на шведската Агенција за миграција дека не може да остане во земјата.
Од Агенцијата за миграција велат дека самото непознавање на обврската да поднесе барање за престој до крајниот рок на крајот на 2021 година не претставува „оправдана причина“ за да ѝ биде дозволено да остане во земјата.
Доцна во понеделникот вечерта била известена дека може да остане во земјата додека не биде разгледано дополнителното барање на нејзиниот адвокат за преиспитување на налогот за депортација.
Сепак, нејзината тешка ситуација останува непроменета, а заканата од депортација засега е само ставена во мирување.
„Само сакам овој кошмар да заврши пред да умрам. На мои години ми е потребен мирен живот“, истакнала Томас.
Томас е меѓу стотиците Британци на кои по Брегзит им било кажано доброволно да ја напуштат Шведска или во спротивно ќе бидат присилно депортирани.
Минатата недела Агенцијата за миграција потврди дека веќе депортирала 458 лица, меѓу кои и 34-годишен маж кој живеел во земјата од својата десетта година. Уште еден британски бизнисмен минатата недела бил приведен во Стокхолм заради депортација.
„Би сакала некој од тие луѓе на власт да има родители во ситуација како мојата. Мислам дека тогаш двапати би размислиле, бидејќи ова е најлошото нешто што може да му се направи на едно човечко суштество“, рекла Томас.
Таа апелира до Европската комисија и до шведската влада да интервенираат не само во нејзиниот случај, туку и за сите британски државјани кои едноставно „направиле грешка“, бидејќи не знаеле дека по Брегзит треба да поднесат формално барање за да останат во Шведска.
„Ве молам, ве молам, дали нè слушате? Не направивме ништо лошо. Не сме криминалци“, нагласила таа.
Шведска потврди дека по Брегзит полицијата депортирала или присилно отстранила 458 британски државјани од земјата.
Ова е првпат јавно да бидат објавени размерите на депортациите на граѓани кои по Брегзит не успеале да обезбедат право на престој во Шведска, а информацијата доаѓа во време на сè поголеми критики поради суровиот и непопустлив пристап кон Британците кои уште пред Брегзит одлучиле Шведска да стане нивен дом.
На некои им било кажано да ја напуштат земјата откако поминале повеќе од 25 години таму, а погодени се дури и ранливи постари лица со деменција. Еден маж бил депортиран иако живеел во земјата уште од својата десетта година.
Сузана Фонсел, раководителка на оддел и правна експертка во шведската Агенција за миграција, за „Sveriges Radio“ изјавила:
„Одбиеното барање не мора нужно да резултира со депортација … а според статистиката на агенцијата, одбивањето на барањето за статус на престој резултирало со одлука за депортација во само околу 400 случаи“, рекла таа за шведското радио.
Шведската владина агенција задолжена за миграција потврди за „Гардијан“ дека по Брегзит биле депортирани 458 британски државјани.
„Според статистиката на агенцијата, одбивањето на барањето за статус на престој од страна на шведската Агенција за миграција било проследено со одлука за депортација во само 458 случаи“, изјави портпарол на агенцијата.
Дејвид Милстед, кој ја предводи активистичката група „Британци во Шведска“, која брои 9.000 членови, изјавил дека е важно Шведска да објави целосни и транспарентни податоци за протерувањата и депортациите, како и за околностите под кои тие биле спроведени.
„Мора точно да разбереме што претставува бројката од 458 лица. Дали таа ги опфаќа луѓето кои се откажале и заминале кога сфатиле дека нивното барање врз основа на Договорот за повлекување веројатно нема да биде одобрено? Дали ги вклучува луѓето на кои им бил одбиен статусот според Договорот за повлекување, а потоа добиле дозвола за престој според националното законодавство, за дури подоцна да им биде наредено да ја напуштат земјата? Сигурно не ги опфаќа луѓето кои во моментов успеваат да останат во Шведска со привремени дозволи, со мала сигурност во однос на нивната долгорочна иднина“, рекол тој.
Денес
