За многумина од околу 5.000 членови на екипажот, престојот во Патаја беше првиот вистински одмор по долгиот период поминат на носачот на авиони, пишува „Њујорк тајмс“.

Јаделе големи хамбургери, купувале дресови на Леброн Џејмс во трговските центри и пиеле свежи пијалаци од кокос на плажа. Дел од нив ноќите ги поминале во познатите клубови и барови, поради кои Патаја со децении е позната по бурниот ноќен живот.

Американскиот носач на авиони „УСС Абрахам Линколн“ пристигнал во пристаништето Лаем Чабанг, во близина на Патаја, во средата. За време на петдневниот престој на екипажот, градот практично насочил голем дел од својата туристичка понуда кон американските војници.

Патаја уште за време на Виетнамската војна стана популарно одморалиште за американските војници. Тогаш градот почнал забрзано да ја развива туристичката и забавната индустрија, вклучително и квартот познат по „го-го“ баровите и другите содржини за возрасни.

Пристигнувањето на екипажот на „Линколн“ го привлече вниманието на локалните бизниси, од ресторани и спа-центри до ноќни клубови. Одредени објекти понудиле специјални попусти за припадниците на американската морнарица и Маринскиот корпус.

Месеци исцрпувачка мисија

Зад забавата во Патаја, сепак, стои исклучително тежок период за екипажот на американскиот носач на авиони.

Седум морнари разговарале со новинарите под услов да останат анонимни, наведувајќи дека повеќемесечниот престој на море, недостигот од вообичаени пристаништа за одмор и проблемите со снабдувањето сериозно влијаеле врз нивното расположение и условите за живот.

Морнарите зборувале за проблеми како затнати тоалети, ограничени резерви и еднолична исхрана. Една од морнарките изјавила дека по неколку месеци поминати на бродот најмногу копнеела по обична салата и свеж зеленчук.

Особено загрижувачки биле тврдењата за повеќе обиди за самоубиство меѓу членовите на екипажот. Американската морнарица, сепак, негира дека на „УСС Абрахам Линколн“ е забележан пораст на обидите за самоубиство.

Еден морнар од Илиноис изјавил дека престанал да ги брои деновите поминати на море откако бројката надминала 200.

„Најлошо беше тоа што не знаевме уште колку долго ќе бидеме на море“, изјавил тој.

Друг морнар од Њујорк, кој претходно поминал низ 12 распоредувања без поголеми проблеми, изјавил дека за време на оваа мисија гледал како помладите членови на екипажот еден по еден психички се кршат.

Тој изјавил дека е подготвен да ја поднесе цената на војната, но дека е тешко да се прифати ситуација во која, како што тврди, логистичката криза можела да биде спречена.

Американскиот секретар за одбрана Пит Хегсет претходно ги опишал тврдењата за тешките услови на „Линколн“ како „погрешно претставени“, додека претседателот Доналд Трамп изјавил дека распоредувањето на носачот на авиони „не било ни приближно доволно долго“.

Патаја ги пречека американските војници

Локалните власти во Патаја настојуваа да покажат благодарност кон американските војници. Градоначалникот дошол да ги пречека членовите на екипажот кои првпат по ноември повторно стапнале на копно.

Една продавница за накит им понудила попусти на припадниците на американската морнарица и Маринскиот корпус, додека одредени клубови рекламирале специјални понуди за лицата со важечки американски воени легитимации.

Мики Фот, еден од сопствениците на барот „Tahitian Queen“ и поранешен припадник на американската војска, кој работел и во Пентагон, изјавил дека разбира низ што поминуваат војниците.

„Не станува збор само за физичкиот стрес, туку и за емоционалниот товар од толку долгиот ангажман“, истакнал Фот.

Патаја за време на престојот на американските војници повторно ја покажа својата позната, но контроверзна страна.

На улицата „Walking Street“, едно од најпознатите средишта на ноќниот живот во градот, некои морнари и маринци посетувале клубови, додека други се решиле за помирни содржини, како ресторани, хотелски базени и спа-центри.

Проституцијата во Тајланд е нелегална, но во Патаја со години отворено се толерира. Поради тоа, градот изгради репутација на една од најпознатите светски дестинации за ноќен живот за возрасни.

Пред пристигнувањето на „УСС Абрахам Линколн“ полицијата спровела акција против проституцијата, но ваквите акции во минатото главно не ја менуваа ситуацијата на долг рок.

Денес американските војници претставуваат значително помал дел од туристите во Патаја отколку во претходните децении. Градот сè повеќе го посетуваат туристи од Индија, Кина и земјите од Блискиот Исток, додека локалните власти се обидуваат да ја претстават Патаја и како дестинација за семејства, култура и одмор.

„Никој не сака војна“

Меѓу полицајците кои патролирале по улиците на Патаја бил и Хуман Песешк, по потекло од Иран, кој веќе десет години живее во овој град.

За него, средбата со американските војници имала посебна иронија, бидејќи тие штотуку пристигнале од носачот на авиони што учествувал во војната против Иран.

„Никој не сака војна што започнала поради нашите лидери. Сите ние овде сме браќа“, изјавил Песешк.

По петдневниот одмор во Тајланд, „УСС Абрахам Линколн“ треба да го продолжи патувањето кон своето матично пристаниште во Сан Диего.

За дел од екипажот, сепак, најважниот луксуз по повеќе од девет месеци на море не била забавата, туку нешто многу поедноставно.

„Тишина“, изјавил еден морнар.

Фото: Њујорк тајмс, Гардијан