Поминаа само неколку недели од спектакуларното откритие во белгискиот град Дендермонде, но приказната за илјадниците златници и десетиците килограми злато е далеку од завршена.

Градежните работници на 14 август, за време на реновирањето на подрумот на старата вила, наишле на нешто што никој не го очекувал.

Во ѕидот биле скриени дури 49 златни прачки, секоја тешка по еден килограм, како и повеќе од 4.000 златници.

Вкупната вредност на пронајденото богатство се проценува на околу девет милиони евра.

Посебно внимание кај истражителите предизвикал начинот на кој било пронајдено златото. Тоа не било сместено во сеф, ниту на некое друго место наменето за чување скапоцености.

Златото било завиткано во вреќа и заѕидано во подрумскиот ѕид.

Токму поради тоа, експертите веруваат дека некој не сакал само да го чува, туку намерно се обидел да го сокрие.

Златните прачки имаат броеви, тоа би можело да ја реши мистеријата

Истрагата сега доби многу важна трага.

Откриено е дека секоја од златните прачки има свој број, што би можело да им овозможи на истражителите да го утврдат нивното потекло, односно каде биле произведени или продадени.

Токму тие броеви би можеле да бидат клучот за решавање на целата мистерија.

Доколку истражителите успеат да го утврдат потеклото на прачките, би можеле да дојдат и до информација кој своевремено ги купил, а потоа и како пред неколку децении завршиле заѕидани во вилата.

Целото богатство по пронаоѓањето било префрлено во обезбеден објект во Брисел, каде што и понатаму се наоѓа под надзор на обвинителството на Источна Фландрија.

Обвинителството истражува две можности

Истражителите во моментов разгледуваат две главни сценарија.

Според првото, станува збор за приватен имот што некој, од засега непознати причини, решил да го сокрие пред повеќе децении.

Втората можност е далеку поинтригантна – златото можеби било сокриено поради незаконски активности.

Поради тоа, можноста пронајденото богатство да е поврзано со криминални активности официјално е дел од истрагата.

Вилата крие интересна историја

Куќата во која било пронајдено златото е позната како „Brouwershuis“, односно Пиварска куќа.

Ја изградил Теофил Ван Аше, сопственик на пиварница која работела од 1899 до 1970 година. На железната порта од вилата и денес можат да се забележат иницијалите „VA“.

По затворањето на пиварницата, имотот останал во сопственост на потомците на семејството.

Поранешниот градоначалник на Дендермонде, Пит Бујс, по пронаоѓањето на златото посочил токму на можноста богатството да е поврзано со семејството Ван Аше.

„Имотот на семејството Ван Аше се пренесувал од генерација на генерација. Воопшто не би ме изненадило доколку во одреден момент дел од тоа богатство го претвориле во злато и го тргнале на безбедно место“, изјавил тој.

Истражителите, сепак, засега не потврдиле директна поврзаност меѓу семејството и пронајденото злато.

Но, не ја ни исклучиле таа можност.

Меѓу првите го видел работник на само 18 години

Еден од првите луѓе кои го здогледале скриеното богатство бил 18-годишниот градежен работник Кобе Филипс.

Иако е свесен дека пронаоѓањето злато вредно девет милиони евра нема автоматски да го направи милионер, младиот работник се надева дека како еден од пронаоѓачите би можел да добие награда.

„Да беа само неколку монети, можеби ќе беше поинаку. Но, вакви суми едноставно не можете да ги сокриете. Можеби ние како пронаоѓачи сепак еден ден ќе добиеме некаква награда“, изјавил тој за белгиските медиуми.

Сопственикот има пет години да се појави

Според белгиските прописи, лицето кое тврди дека е сопственик на пронајденото богатство има пет години да ја докаже својата сопственост.

Засега, сепак, никој не се пријавил.

Истрагата продолжува, а броевите втиснати на златните прачки би можеле да го дадат најважниот одговор досега – од каде потекнува богатството вредно речиси девет милиони евра и кој го заѕидал во подрумот на старата Пиварска куќа.

Додека истражителите не го утврдат потеклото на златото или не се појави неговиот сопственик, 49 килограми златни прачки и повеќе од 4.000 златници остануваат во центарот на една од најголемите мистерии откриени оваа година во Белгија.