Андервуд е автор на каналот на „YouTube“ наречен „Ghost Town Living“, а ја потрошил својата животна заштеда за да стане сопственик на Серо Гордо, некогашна рударска населба во Калифорнија, основана во 1865 година.

Место со „изразено насилство“

Серо Гордо своевремено бил едно од најпросперитетните места за експлоатација на сребро во оваа американска сојузна држава.

На врвот од својот развој, според достапните податоци, таму имало повеќе од 4.500 рудари, додека од околните ридови низ годините биле извадени минерали во вредност од речиси 500 милиони долари.

Сепак, животот во ова гратче бил далеку поопасен отколку што би можело да се очекува. Според Андервуд, чуварите на редот и мирот главно не влегувале во Серо Гордо, па рударите честопати самите ги решавале меѓусебните конфликти. Таквите околности придонеле местото да стекне репутација на населба со „изразено насилство“.

Но, најморничавите приказни не се случувале на улиците, туку длабоко под земјата. Андервуд раскажал за тешка несреќа што се случила во текот на 1870-тите години.

Последното забележано убиство

„Непознат број кинески рудари заминале на работа, а дел од рудникот се урнал врз нив и ги затрупал. За жал, телата никогаш не биле пронајдени“, раскажал Андервуд.

Сепак, неколку години подоцна било пронајдено едно тело. Андервуд наведува дека, наводно, било речиси „совршено зачувано“.

„Ако ги погледнете архивските новинарски текстови, ќе видите дека во овој рудник се случиле повеќе несреќи, што го прави неверојатно морничав, особено кога ќе се спуштите долу“, изјавил тој.

Ниту она што се случувало над земјата не било многу попријатно. Андервуд го покажал и местото каде што, според историските записи, се случило последното забележано убиство во Серо Гордо.

Побегнал во рудниците и исчезнал

Тоа се случило на 29 декември 1892 година, кога Хенри Болин бил убиен со огнено оружје по средбата со Вилијам Крапо.

Според наводите, Крапо побегнал во околните рудници и исчезнал. Била организирана потрага, а за информација што би довела до негово апсење била понудена награда од 500 долари. И покрај тоа, никогаш не бил пронајден.

Сепак, Андервуд тврди дека најмногу го вознемируваат настаните на кои лично бил сведок.

Една вечер поминувал покрај зграда во која некогаш биле сместени работниците. Тогаш, како што тврди, забележал дека „завесите се поместиле и се отвориле“.

Потоа, според неговите зборови, видел „лице“ како ѕирка низ прозорецот.

Обнова на историската населба

Андервуд ја проверил зградата и утврдил дека во неа нема никој. Потоа го пребарал објектот, го заклучил и ставил катанец.

Но, следната вечер се случило нешто што за него било уште понеобично. Тврди дека светлото во зградата „повторно било вклучено“. Оттогаш избегнува да влегува во тој објект.

И покрај мрачното минато на Серо Гордо, Андервуд нема намера да се откаже од него.

Напротив, неговата цел е да ја обнови историската населба и еден ден да им овозможи на поголем број луѓе да преноќат таму и да почувствуваат како изгледа престојот во автентичен калифорниски „град на духови“.