Младенчето било пронајдено целосно исцрпено, а по спасувачката акција било префрлено во Центар за рехабилитација. Таму било утврдено и дека станува збор за мажјак, кој го добил името Алексис.

Три дена чекале да видат дали мајката ќе се врати

Сè започнало кога ветеринарката Талија Лазариди на една од плажите на Спецес забележала осамено младенче. Набрзо се вклучиле експерти од непрофитната организација „Spetses Care For Animals“ („SCFA“), Друштвото за проучување и заштита на средоземноморската фока „MOm“, како и локалната Капетанија на пристаништето.

Во следните три дена младенчето постојано се преместувало од една на друга плажа, додека експертите го следеле речиси без прекин.

Иако првиот инстинкт на многумина бил веднаш да му помогнат, спасувачите не го направиле тоа. Кај дивите и заштитени животни важно е да се утврди дали младенчето навистина е напуштено, бидејќи прераната човечка интервенција би можела да го спречи неговото повторно спојување со мајката.

– Не пристапивме веднаш кон спасување, бидејќи кај дивите и заштитени видови не смеете да интервенирате произволно. Го следите развојот на ситуацијата и ги почитувате исклучиво упатствата на луѓето кои се специјализирани за тоа – објаснила Катерина Војаци од „SCFA“ за „Euronews“.

Третиот ден повеќе не можеле да чекаат

Ситуацијата станала критична третиот ден. Младенчето било пронајдено исцрпено на брегот, а околу него се собрал голем број луѓе.

Бучавата, вревата и приближувањето на љубопитните посетители претставувале дополнителен стрес за веќе ослабеното животно, па била донесена одлука веднаш да се реагира.

Со помош на Капетанијата на пристаништето и според инструкциите на експертите од организацијата „MOm“, младенчето било тргнато од плажата. Ветеринарката од „SCFA“ го извршила првиот преглед и му ја пружила неопходната помош, по што бил организиран превоз со траект до Центарот за рехабилитација.

Мислеле дека е женка, а потоа следувало изненадување

Дури откако младенчето пристигнало во Центарот, спасувачите дознале уште еден детаљ. Животното за кое во текот на акцијата мислеле дека е женка, всушност било мажјак.

Го добил името Алексис.

– Дознавме нешто што не го знаевме во текот на трите дена следење – нашата „мала“ всушност е малечок! Организацијата „MOm“ му го даде името Алексис. Станува збор за штотуку роден мажјак и првото овогодишно сираче кое се нашло во нивниот Центар за грижа – изјавила Војаци.

Првите прегледи покажале дека Алексис е дехидриран и неухранет, но неговата општа здравствена состојба, според информациите од спасувачите, не е сериозно загрозена. Сега се наоѓа под постојан надзор на експерти.

Важен апел до туристите во Грција

Спасувачите ја искористиле приказната за Алексис и за да ги предупредат туристите како треба да се однесуваат доколку на плажа наидат на фока или на некое друго диво животно.

– Дивото животно не е спектакл. Кога ќе сретнеме фока на брегот, треба да држиме дистанца и да ги известиме надлежните институции. Присуството и љубопитноста на преголем број луѓе во непосредна близина на веќе ранливо животно можат само дополнително да ја отежнат ситуацијата – порачала Војаци.

За Алексис сега следува период на закрепнување. Целта на експертите е младенчето доволно да зајакне и да стане способно за самостоен живот, по што би требало да биде вратено таму каде што припаѓа – во морето.