Гостувајќи во поткастот на Стив Бракнал, музичарот признал дека размислува да носи перика бидејќи косата што моментално ја има се обидува да ја одржува со помош на специјална пудра за волумен.

„Јас сум поп-ѕвезда, од мене се очекува да изгледам добро“

Во разговорот Вилијамс објаснил како се справува со проретчената коса. „Ја губам косата, сега сè е пудра и разни трикови. Ја гледаш ли пудрата?“, се пошегувал тој со водителот. Пудрата за коса се користи за додавање волумен и текстура, а многумина ја користат за да ги прикријат проретчените делови. Бракнал му одговорил дека не му се гледа скалпот и дека производот очигледно делува, а потоа го прашал што всушност го загрижува.

„Јас сум поп-ѕвезда, тоа е мојата работа. Од мене се очекува да изгледам на одреден начин и да имам коса“, рекол Вилијамс. Пејачот додал дека го загрижува тоа што косата сè повеќе му паѓа и покрај триковите што ги користи. „Размислувам да набавам еден од оние додатоци за коса“, открил тој. Станува збор за додатоци што ги покриваат деловите погодени од губење на косата, познати и како тупе.

Проговорил за аутизмот и менталното здравје

Освен за изгледот, Вилијамс неодамна проговорил и за своето ментално здравје. На почетокот од месецот открил дека му е дијагностициран поблаг облик на аутизам и дека и понатаму се бори со наметливи мисли. На пејачот претходно му бил дијагностициран АДХД, а сега потврди дека добил и дијагноза на нарушување од аутистичниот спектар.

На претставувањето на колекцијата на својот моден бренд „Hopeium“, Вилијамс рекол дека новото сознание за себе го доживува како „карта за излез од затвор“. Пејачот објаснил дека дијагнозата му помага подобро да разбере некои аспекти од сопственото однесување.

„Имам АДХД, а штотуку дознав дека имам и малку аутизам, што всушност ми е еб**о супер бидејќи објаснува толку многу работи. Сега тоа ми е карта за излез од затвор. За сите чудни работи што ги правам, само велам: ’Извинете, аутистичен сум‘“, низ шега рекол тој.