„Mercedes“ темелно ја обнови актуелната C-класа и со тоа потврди дека доаѓањето на целосно електричната верзија не значи крај за класичните погони. Лимузината и караванот и понатаму ќе се нудат со бензински и дизелски мотори, како и во „plug-in“ хибридни изведби, но со значително повеќе нова технологија.

Производителот ја опишува оваа модернизација како најобемната техничка надградба во историјата на C-класата. Промените не се ограничени само на неколку нови браници и светла – освежени се моторите, подвозјето, инфозабавниот систем и системите за помош на возачот.

Бензинците и дизелите остануваат

Бензинската понуда ја сочинуваат дволитарски четирицилиндрични мотори во три нивоа на моќност. „C 200“ развива 177 КС, „C 250“ има 218 КС, додека „C 300“ доаѓа со 258 КС. Сите користат 48-волтен благ хибриден систем со интегриран стартер-генератор, кој краткотрајно може да додаде до 17 kW, односно околу 23 КС.

„Mercedes“ не се откажа ниту од дизелите. Модернизираниот дволитарски мотор ќе се нуди со 163 и 200 КС, а подготвен е и за користење одредени алтернативни горива како „HVO100“.

На врвот на класичната понуда се наоѓа „plug-in“ хибридот „C 400 e 4Matic“. Комбинацијата од бензински и електричен погон испорачува вкупно 395 КС и 650 Nm, додека батеријата со употреблив капацитет од 19,53 kWh овозможува до 100 километри возење на електрична енергија според „WLTP“. Интересно е што поддржува и брзо „DC“ полнење со моќност до 55 kW.

„Mercedes“ наведува дека целата понуда на мотори е подготвена за идните барања на стандардот „Euro 7“.

Нов изглед, но C-класата останува препознатлива

Најголемата визуелна промена се наоѓа на предниот дел. C-класата добива нова маска со понагласена хромирана рамка и осветлување, а ѕвездите сега се појавуваат и во светлосниот потпис на предните светла. Кај лимузината истиот мотив се пренесува и на задните светла.

Во зависност од пазарот, може да биде осветлена и големата ѕвезда на „Mercedes“ во средината на маската. Новина се и проекторите интегрирани во праговите, кои при отворањето на вратите проектираат шара на подлогата.

Поголеми револуции нема ниту во кабината. И понатаму тука се 12,3-инчните дигитални инструменти и вертикално поставениот централен екран од 11,9 инчи, но софтверот е целосно модернизиран.

C-класата преминува на новиот оперативен систем на „Mercedes“, „MB. OS“, и четвртата генерација на „MBUX“. Гласовниот асистент ги комбинира технологиите на „ChatGPT“, „Microsoft Bing“ и „Google Gemini“ и може да води посложен разговор и да го памети контекстот на претходните прашања.

„Mercedes“ притоа направи и мал чекор назад кон класичните команди. Новиот управувач повторно има физичко тркалце за јачината на звукот, како и прекинувач за темпоматот и „Distronic“, наместо потпирање исклучиво на површини чувствителни на допир.

Полесно паркирање и до 100 километри на струја

Доработено е и подвозјето, а опционалното управување со задните тркала овозможува нивно свртување до 2,5 степени. Со тоа кругот на вртење се намалува за 43 сантиметри, на 10,64 метри, што би требало да го олесни маневрирањето во град.

Проширена е и понудата на системи за помош на возачот. C-класата може автоматски да ја менува сообраќајната лента на автопат, да помага при паркирање и, во одредени услови, автоматски да го врати автомобилот наназад по дел од патеката што претходно ја поминал движејќи се напред.

Новата генерација на опционалните „DIGITAL LIGHT“ светла користи „micro-LED“ технологија, а осветлената површина е зголемена за околу 40 проценти, со помала потрошувачка на енергија.

Нарачките во Германија се отворени на 18 август. Почетната цена на лимузината „C 200“ изнесува 48.844 евра со германски ДДВ. 

„Mercedes“ на тој начин ја поставува C-класата во интересна позиција. Целосно електричниот модел сега постои паралелно со класичната лимузина и караванот, а купувачите кои сè уште не сакаат целосно да преминат на електричен погон добиваат бензинци, дизели и „plug-in“ хибриди во значително модернизиран пакет.