Во видеото што во вторникот за време на паузата го снимил за Инстаграм, Вилијамс опишал што се случило. „Штотуку завршив три часа настава и буквално се скршив среде часот“, рекол.

Вилијамс, наставник во програмата за стручно образование, на матурантите им дал задача врз основа на два прочитани извадоци да ја довршат реченицата, за која веќе им ги дал речиси сите потребни информации. Бил шокиран кога тие не успеале.

„Всушност, јас ја довршив реченицата наместо нив“, раскажал тој. „Тоа се млади луѓе на возраст од 17 и 18 години, а не успеаја да напишат четири зборови. Четири зборови!“.

„Им ја објаснив ситуацијата, заедно водевме белешки. Им ги дадов одговорите уште пред воопшто да стигнеме до задачата, а тие сепак не знаеја да ја решат. Едноставно не знам во што е проблемот“, додал тој.

„Ова е дури втор ден од учебната година, а јас имам матуранти кои едноставно не знаат да читаат и матуранти кои не знаат да пишуваат. Не знаат да пишуваат“, рекол Вилијамс.

Видливо потресен и во солзи, објаснил дека неговите ученици можат да разговараат, логички да размислуваат и да ги аргументираат своите ставови, но не успеваат истите тие вештини да ги пренесат на хартија.

„Нашите млади црнци и Латиноамериканци, нашите млади црнки и Латиноамериканки“, рекол Вилијамс, по што заплакал и го прекинал снимањето.

Критики по објавувањето на видеото

По објавувањето на видеото, Вилијамс се нашол на мета на бројни критики. Некои корисници на социјалните мрежи ги довеле во прашање неговите квалификации, додека други сметале дека не би требало јавно да зборува за проблемите со писменоста на своите ученици.

Вилијамс, кој е познат и како кулинарски инфлуенсер, одговорил со објавување докази за своето образование. Тој покажал диплома за основни академски студии, која во април ја стекнал на Беркли, и навел дека моментално посетува постдипломски студии за развој на наставни програми на „American College of Education“.

Ги покажал и своите наставнички сертификати, меѓу кои се и оние што ги издаваат сојузната држава Тексас и Тексашката образовна агенција.

„Ги имам сите потребни сертификати“, порачал Вилијамс во новото видео.

Потоа им одговорил на критичарите: „Сите вие што имате проблем со тоа што јас ги подучувам младите луѓе, повелете, преземете одговорност. Стекнете ги сертификатите, дојдете во овие средни училишта и застанете пред одделение од 22 ученици, час по час, па да видам како ќе се снајдете“.

Загрижувачки резултати и во Њујорк

Видеото на Вилијамс се појавило само неколку дена по објавувањето на новите податоци за знаењето на учениците во Њујорк. Според прелиминарните резултати, голем број ученици од трето до петто одделение во минатата учебна година не постигнале задоволителен резултат на стандардизираните тестови по англиски јазик.

Податоците објавени оваа недела покажуваат дека задоволително ниво на тестовите во учебната 2025/2026 година не постигнале 57 отсто од учениците од трето одделение, 52 отсто од учениците од четврто и 57 отсто од учениците од петто одделение, пренесува „Index.hr“.