Дури кога ќе се најдеме некаде далеку од сообраќајниците и метежот, меѓу шуми, планини или на осамен брег, сфаќаме колку ни недостигала тишината. Сè повеќе патници на одмор ја бараат токму тишината, па ново истражување се обиде да даде одговор на прашањето кои земји во светот всушност се најтивки. Европа не се прослави на оваа листа, но се издвои една земја која многумина често ја занемаруваат.

Како се избрани најтивките земји во светот?

Како што пишува „Јуроњуз“ туристичката компанија „Go2Africa“ го изработила „Noise-Free Nations Index“, односно индексот на земји во кои постојат најдобри услови за бегство од бучавата, метежот и интензивниот сообраќај. При анализата не бил земен предвид само бројот на жители, туку и бројот на туристи, автомобили, аеродроми и возови.

Авторите на истражувањето, значи, не ги мереле децибелите на улиците во одделни градови, туку анализирале низа показатели што можат да влијаат врз тоа колку лесно една земја може да се доживее како мирна и ненаселена.

Предвид биле земени густината на населението, густината на туристите, уделот на руралните области и заштитените подрачја, бројот на моторни возила, густината на аеродромите, како и густината на железничката мрежа.

Секоја земја добила бодови за одделните показатели, а со нивно комбинирање бил пресметан вкупниот резултат на скала од 0 до 100. Колку е повисок резултатот, толку земјата, според оваа методологија, се смета за посоодветна за патниците кои бараат мир и простор далеку од големиот метеж.

Се покажа дека најтивкиот дел од Европа е северот, а на целата планета – Африка

Се покажа дека Европа нема ниту една земја меѓу 25-те најтивки во светот. Најдобар резултат во Европа оствари Естонија, која го зазеде дури 34. место на глобалната ранг-листа. Следува Финска на 39. место, додека Шведска се најде на 40. место.

Глобален победник е Бутан, додека најмногу „тивки“ земји на врвот на листата има Африка.

Естонија е земја на шуми, мочуришта и повеќе од 2.000 острови

Естонија е една од најмалите и најретко населените земји во Европската унија, а токму изобилството од простор и природа ѝ дава посебен шарм. Речиси половина од нејзината територија е покриена со шуми, додека нејзиниот пејзаж го обликуваат бројни езера, мочуришта, тресетишта и разгранетиот брег на Балтичкото Море.

На Естонија ѝ припаѓаат и повеќе од 2.000 острови и островчиња, меѓу кои најголеми се Сарема и Хиума, познати по светилниците, ветерниците, камените цркви и побавниот ритам на живот.

Едно од најдобрите места за запознавање на дивата природа на Естонија е Националниот парк Лахема, недалеку од Талин, каде што се испреплетуваат густи шуми, патеки низ мочуришта, рибарски села и историски благороднички имоти.

Токму ваквите пејзажи објаснуваат зошто Естонија се најде на врвот на европскиот дел од листата на најтивки земји.

Најтивката земја во светот се наоѓа во подножјето на Хималаите

Првото место на глобалната ранг-листа го освои Бутан, со резултат од дури 89,44 од можни 100 бодови. Голема улога во неговото рангирање има фактот што огромни површини од земјата зафаќаат пошумени планини, терасирани полиња и високи хималајски предели.

Станува збор за земја во која руралните области и природата сè уште имаат доминантна улога.

Бутан веќе со години спроведува туристичка политика со која намерно го ограничува масовниот туризам. Посетителите мора да плаќаат посебна такса за одржлив развој, поради што патувањето во Бутан е значително поскапо отколку во многу други азиски земји.

Ваквиот пристап го намалува бројот на туристи и е една од причините поради кои земјата, според овој индекс, успеала да задржи исклучително високо ниво на мир и простор.

Десетте најтивки земји во светот:

1. Бутан – 89,44 бода

2. Намибија – 86,69

3. Боцвана – 80,86

4. Замбија – 80,64

5. Габон – 80,61

6. Венецуела – 80,20

7. Чад – 79,82

8. Централноафриканска Република – 78,18

9. Монголија – 75,53

10. Боливија – 75,40.

Петте најгласни земји во светот:

1. Сингапур – 6,78 бода

2. Малдиви – 8,48

3. Барбадос – 10,12

4. Катар – 15,45

5. Либан – 18,13.