Во Лондон е купен добитен лотариски билет вреден седумцифрен број, а Националната лотарија очајно го бара среќниот добитник.
Националната лотарија ги повика граѓаните на Велика Британија да ги проверат своите билети, додека потрагата по добитникот продолжува.
Добитниот билет е купен во лондонскиот округ Ричмонд, а среќниот играч ги погодил сите пет главни броеви, како и бонус топката, освојувајќи ја наградата од милион долари.
Добитните броеви од извлекувањето одржано на 19 август се: 4, 8, 10, 17, 23 и 28, додека бонус топката беше 16.
Дури и ако добитникот повеќе не го има билетот со себе, тој сепак може да поднесе барање за исплата до компанијата „Allwyn“, објавува британскиот весник „The Sun“.
Сепак, рокот за ова истекува 30 дена по извлекувањето, односно денеска, 18 септември.
Од друга страна, оние кои го зачувале својот билет имаат значително повеќе време. Нивниот рок за преземање на добивките истекува на 15 февруари 2027 година.
Тоби Моксам, раководител на услугите за добивки во „Allwyn“, кој ја води Националната лотарија, ги повика потенцијалните добитници да ги проверат своите стари билети.
„Замислете си само да откриете дека билетот што сте го купиле пред неколку недели вреди седумцифрена сума. Токму тоа може да му се случи на играч на Лото од лондонската општина Ричмонд“, изјавил Моксам.
Тој ги поканил граѓаните да помогнат во потрагата по добитникот.
„Разговарајте со пријатели, семејство, колеги и соседи - веруваме дека можеме да го најдеме добитникот што ни недостасува, но потребна ни е помош од јавноста“, изјавил тој.
Секој што верува дека би можел да биде мистериозниот милионер е поканет да контактира со Националната лотарија по телефон или е-пошта за да поднесе барање за да ја добие наградата.
