Норвешкиот фудбалски репрезентативец Ерлинг Халанд за време на одморот на Сицилија се нашол во необична ситуација кога сфатил дека сицилијанските туристички водичи „осмислиле“ рута која води до неговата јахта. Славниот фудбалер ја сподели необичната ситуација на својот „YouTube“ канал, на кој го прикажува својот живот надвор од фудбалските терени.

Фудбалерот стана туристичка атракција

Како што се гледа на видеото, кон јахтата на Халанд се приближувал туристички брод полн со луѓе. Патниците возбудено довикувале, мавтале и се обидувале да го фотографираат напаѓачот на Манчестер Сити, како и да го привлечат неговото внимание.

Халанд не се налутил поради вниманието, ниту се повлекол кога бродот се приближил до јахтата. Останал добро расположен, ги поздравил туристите и со насмевка ја коментирал сцената која очигледно го изненадила.

„Организираат туристички тури со брод. Минуваат покрај местото каде што престојувам“, коментираше Халанд во видеото.

Откако сфатил дека бродот е дел од организирана тура, Халанд целата ситуација ја претворил во шега. Имитирал туристички водич кој на туристите им ја претставува локацијата на која престојува фудбалската ѕвезда.

„Дојдете и погледнете каде престојува Ерлинг Халанд“, се пошегува норвешкиот репрезентативец. На крајот призна дека никогаш претходно не доживеал нешто слично. „Никогаш не сум видел ништо вакво“, заклучи Халанд.

Напаѓачот на Сити одмора на Сицилија по Светското првенство, на кое Норвешка беше елиминирана од Англија во четвртфиналето, а Халанд постигна седум гола.

Во коментарите му се јавија бројни обожаватели кои, исто како и него, се насмеаја на целата ситуација.

„Единствениот проблем со ова видео е што е прекратко“, „Халанд стана туристичка дестинација“, „Никогаш не мислев дека ќе бидам фудбалски фан, но го обожавам овој човек“, „Луѓето пловат со брод за да го видат како одмора на јахта, тотално лудо“, се само дел од коментарите.