Авељаноса де Муњо се наоѓа во северната шпанска покраина Бургос. Ова мало место нема ресторани ниту продавници, има само еден бар кој никогаш не работи и винска визба која никогаш повеќе нема да биде отворена.

На 12 август 2026 година, целосно затемнување на сонцето ќе помине над Атлантскиот Океан и Европа, што ќе биде првото целосно затемнување видливо од европското копно уште од 1999 година.

Според физичарката од Мадрид, д-р Марија Тереза Лопес Санчес, тоа ќе биде првото целосно затемнување на сонцето видливо од копното на Шпанија од 1912 година, пишува Би-би-си.

Сепак, целосен мрак ќе биде видлив само по тесен појас низ континентот, а Авељаноса де Муњо се наоѓа токму на таа патека.

Она што го прави ова мало село особено привлечно место за набљудување е неговиот пејзаж: златните пченични полиња и благите ридови го отвораат погледот кон широкиот западен хоризонт, со многу малку градби, речиси без вештачко осветлување и без големите толпи што се очекуваат на попознатите места за набљудување.

Времето на затемнувањето го прави настанот уште поспецијален. Бидејќи ќе се случи непосредно пред зајдисонце, ќе создаде ефект на двоен самрак.

„Како да гледате два зајдисонца за само неколку минути“, објасни д-р Лопес Санчез.

Подоцна истата ноќ, ќе биде видлив и метеорскиот дожд Персеиди, па така два спектакуларни небесни настани ќе се совпаднат.

Планирање на патување поради затемнувањето

Како да стигнете таму: Авељаноса де Муњо е на околу 30 минути возење од Бургос и нешто повеќе од два часа од Мадрид.

Каде да престојувате: Во селото нема туристички сместувачки капацитет, а хотелите во блиската Лерма одамна се целосно резервирани. Сè уште има слободни места во Бургос, како и во Мадрид, од каде што е можно еднодневно патување, но по затемнувањето треба да очекувате големи сообраќајни метежи.

Кога да се набљудува: Затемнувањето во Авељаноса започнува околу 19:33 часот, целосната фаза настапува малку по 20:29 часот и трае малку помалку од две минути.

Не заминувајте веднаш по зајдисонцето: Метеорскиот дожд Персеиди ќе биде активен истата ноќ. Бидејќи се очекува малку месечина, темното рурално небо на Авељаноса може да биде одлично место за набљудување, под услов небото да е ведро и да се оддалечите од локалното осветлување.

Село кое повторно ќе „оживее“ благодарение на затемнувањето

За жителката Сара Алварес Родригез нема дилема каде треба да се оди.

„Одете горе кон пештерата. Оттаму можете да видите сè“, изјави таа.

Родена во Авељаноса де Муњо во 1937 година, Сара никогаш не живеела на друго место. Речиси деведесет години, таа го набљудувала селото како целосно се менува. Како што се присети, во 1950-тите селото имало околу 200 жители и неколку мали продавници. Рибарите од селото користеле велосипеди за да одат во околните градови за да го продадат својот улов.

Раул Гранде Ревиља, кој е роден тука пред 1973 година, но се преселил во Мадрид како дете, се присети на поштарот кој носел писма и весници на магаре.

Механизацијата и емиграцијата целосно го променија Авељаноса де Муњо, каде што земјоделството некогаш издржувало стотици жители.

Со генерации, селото живеело од земјоделско производство без наводнување, зеленчукови градини, лозја и добиток. Потоа земјоделството станало механизирано. Бидејќи немало многу други работни места во областа, луѓето оделе во Мадрид, Билбао, Барселона и други градови.

Денес, на околните падини на Авељаноса пасат повеќе кози отколку што има луѓе кои живеат во селото, а огромни полиња со сончогледи се шират таму каде што некогаш стотици селани ја обработувале земјата.

Но ова лето, затемнувањето ги враќа некои од тие семејства дома.

По повод настанот, Гранде ќе дојде со својата партнерка, син, внуци и голема група пријатели исто така и неговиот брат ќе дојде со три деца, внук и сестра, па заедно ќе донесат околу дваесет луѓе и практично ќе го удвојат бројот на жители на селото за една ноќ. И тој нема да биде единствениот.

Алварес истакна дека другите соседи ќе бидат домаќини на пријатели и роднини, кои доаѓаат од цела Шпанија, но и од Велика Британија, Франција и Венецуела.

Д-р Лукреција Лопес, професорка на Одделот за географија на Универзитетот во Сантијаго де Компостела, смета дека еднократните настани како што е затемнувањето можат да ги охрабрат луѓето „повторно да откријат место со кое веќе имаат некаква врска“.

Интересот за селото започна уште во 2022 година

Во Авељаноса, ова повторно откривање веќе се прошири на луѓе кои никогаш не живееле во селото.

Интересот за затемнувањето започна пред неколку години – хотелот Парадор де Лерма беше целосно резервиран уште во 2022 година.

Блискиот хотел Парадор де Лерма, сместен во поранешната палата на војводата од Лерма е целосно резервиран за овој настан уште од 2022 година, а Алберто Боске Коељо од Туристичката организација на Кастиља и Леон рече дека истата ситуација се повторува низ целиот регион.

„Поголемиот дел од нашиот сместувачки капацитет е целосно резервиран. Всушност, резервациите се прават многу однапред“, објасни тој, додавајќи дека експертите за затемнување го барале „најдоброто, а не најпознатото место“, бидејќи сакале оптимални услови за гледање.

Гранде, исто така, раскажа за семејство од Калифорнија кое планира да патува во Шпанија за затемнувањето. За да не ја пропуштат целата фаза престојувајќи во Мадрид, тој одел од куќа до куќа прашувајќи дали некој во Авељаноса може да ги угости, за да можат да го доживеат затемнувањето од, според него, најдобрата точка за набљудување во цела Шпанија.

На прашањето како е кога село со десет жители одеднаш се наоѓа во центарот на вниманието, Гранде се насмеа и кимна со главата.

„Баш така“, рече тој, воодушевен што неговото мало село барем за кратко го привлекува вниманието на целиот свет.

Низ целата покраина Бургос, заедниците подготвуваат места за набљудување и собирање по повод затемнувањето. Но, во Авељаноса де Муњо и локалното население и посетителите ќе се упатат кон пештерите над селото.

Пештерите над селото нудат широк и непречен поглед кон западниот хоризонт

Бидејќи за време на полната фаза Сонцето ќе биде само осум степени над хоризонтот, непречениот поглед кон запад ќе биде клучен, па затоа пештерите ќе бидат совршено место за овој небесен спектакл што се случува еднаш во генерацијата.

Но, пештерите не се само одлична опсерваторија. Со генерации, мештаните се собирале таму за да го гледаат зајдисонцето заедно, а еден поранешен жител дури сакал неговата пепел да биде расфрлана токму на тоа место. За селото, тоа има длабока емоционална вредност.

На денот на затемнувањето, селото Авељаноса де Муњо повторно ќе биде исполнето со бучава. Мирисот на печени јагнешки котлети ќе го исполни просторот каде што ресторани всушност не постојат, а детската смеа ќе одекнува на местото каде што некогаш било училиштето.

Потоа, во текот на неколку извонредни минути, темнината ќе падне двапати. И благодарение на необична комбинација на географски околности, едно од најзаборавените села во Шпанија накратко ќе стане центар на светот.

Фото: Би-би-си